راولپنڈی(این این آئی)راولپنڈی میں دہشتگردی کے خدشے کے پیش نظر 7روز کیلئے دفعہ 144نافذ کر دی گئی اور ڈبل سواری پر بھی پابندی ہوگی۔ضلعی انتظامیہ نے15سے21مئی تک دفعہ144کے نفاذ کا نوٹیفکیشن جاری کر دیا۔نوٹیفکیشن میں بتایا گیاکہ انٹیلیجنس رپورٹس کے مطابق راولپنڈی کی حدود میں دہشتگردی کا خدشہ ہے،دفعہ 144کے تحت راولپنڈی میں ہر قسم کے سیاسی و مذہبی اجتماع پر پابندی ہوگی۔نوٹیفکیشن کے مطابق شہر میں موٹرسائیکل کی ڈبل سواری پر بھی پابندی عائد کر دی گئی ہے،خواتین، بچوں اور آرمی اہلکاروں کو ڈبل سواری کی پابندی سے استثنیٰ حاصل ہوگا۔راولپنڈی میں اذان کے علاوہ لاڈ اسپیکر کے استعمال پر پابندی ہوگی۔