شارجہ ( این این آئی) پاکستان کرکٹ ٹیم کے فاسٹ بولر احسان اللہ کی گیند کھیلنے میں ناکامی کے باعث افغان بیٹر نجیب اللہ زادران زخمی ہوگئے۔شارجہ میں کھیلے گئے تیسرے ٹی ٹونٹی میچ میں افغانستان کی اننگز کے 11ویں اوور میں نجیب اللہ زادران پہلی ہی گیند پر زخمی ہو کر

گرائونڈ سے باہر چلے گئے اور میچ ختم ہونے تک بیٹنگ کے لیے نہ آئے۔میچ کے 11ویں اوور میں احسان اللہ نے افغان بیٹر کو بائونسر کرائی جو وہ کھیلنے میں ناکام رہے اور گیند ہیلمٹ کے اندر سے چہرے کے نچلے حصے پر لگی اور خون نکلنے لگا۔احسان اللہ کی تیز بائونسر سے افغان کھلاڑی کے زخمی ہونے کے بعد شائقین کرکٹ کو سابق پاکستانی بولر شعیب اختر یاد آگئے۔شعیب اختر نے ماضی میں اپنی تیز رفتار گیندوں سے برائن لارا، گیری کرسچن سمیت کئی کھلاڑیوں کو زخمی کرکے میدان سے باہر بھیجا۔احسان اللہ کی نجیب اللہ کو کرائی گئی بانسر کا موازنہ سوشل میڈیا صارفین نے شعیب اختر کی برائن لارا کو کرائی گئی بانسر سے کیا۔واضح رہے کہ 3 ٹی ٹونٹی میچوں کی سیریز کے آخری میچ میں پاکستان نے افغانستان کو 66رنز سے شکست دی تھی۔