اسلام آباد ( آن لائن)وزیر اعظم شہباز شریف نے پیپلز پارٹی کے احسان مزاری کی وزارت تبدیل کر دی اور ان سے وزارت انسانی حقوق کا قلمدان واپس لیکر انہیں وفاقی وزیر برائے بین الصوبائی رابطہ امور بنا دیا گیا ہے جبکہ معاون خصوصی برائے خارجہ امور طارق فاطمی

کو بھی نیا قلمدان دیا جائیگا ان سے خارجہ امور کی وزارت کا قلمدان بعض اداروں کے تحفظات کے بعد واپس لیا گیا ہے تاہم وہ بدستور معاون خصوصی رہیں گے ۔دوسری جانب وفاقی وزیر برائے آبی وسائل سید خورشید احمد شاہ نے وزارت آبی وسائل کا باقاعدہ چارج سنبھال لیا۔ اس موقع پر سیکرٹری برائے وزارت آبی وسائل ڈاکٹر کاظم نیاز نے سید خورشید احمد شاہ کو وزارتی امور پرتفصیلی بریفنگ دی۔ اس موقع پر میٹنگ میں شریک افسران سے بات چیت کرتے ہوئے وزیر آبی وسائل نے کہا کہ اگر ہم نے بطور ٹیم قومی جذبے سے کام کیا تو ہم اس ملک کی تقدیر بدلنے میں کامیاب ہو سکتے ہیں۔ انہوں نے کہا کہ پانی سے زندگی، زراعت،صنعت اور ہماری ترقی وابستہ ہے۔ انہوں نے کہا کہ ملک کے اجتماعی مفاد کیلئے ہم سب انتہائی محنت اور لگن سے کام کریں گے تاکہ ہم اس ملک کی ترقی میں اپنا نمایاں کردار ادا کرسکیں۔

موضوعات:طارق فاطمی