راولپنڈی ( آن لائن+ این این آئی ) آرمی چیف جنرل قمر جاوید باجوہ سے فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی )کے ممبران نے ملاقات کی ہے ۔ آئی ایس پی آر کے مطابق ملاقات کے دوران پاکستان میں تجارتی و صنعتی مراکز کی ترقی میں ایف پی سی سی آئی کے کردار کے ساتھ ساتھ ابھرتے ہوئے

علاقائی ، اقتصادی ماحول سے متعلق تبادلہ خیال کیاگیا ۔ اس موقع پر آرمی چیف نے پاکستان کی اقتصادی ترقی میں کاروباری برادری کے کردار کو سراہا اور پاکستان فوج کی جانب سے مکمل حمایت کا اعادہ کیاگیا ۔ وفد نے پاکستان میں اقتصادی خوشحالی کیلئے محفوظ ، سازگار ماحول کی فراہمی میں پاک فوج کے کردار اور قربانیوں کا اعتراف کیا۔دوسری جانب آرمی چیف جنرل قمر جاوید باجوہ سے چینی سفیر نونگ رونگ نے ملاقات کی جس میں باہمی دلچسپی کے امور ، سی پیک میں پیشرفت پر تبادلہ خیال کیا گیا۔ آئی ایس پی آر کے مطابق آرمی چیف جنرل قمر جاوید باجوہ سے چینی سفیر نے ملاقات کی جس میں باہمی دلچسپی کے امور، سی پیک میں پیشرفت پر تبادلہ خیال کیا گیا۔ آئی ایس پی آر کے مطابق ملاقات میں علاقائی سیکیورٹی صورتحال بالخصوص افغان امن عمل میں حالیہ پیش رفت پر بات چیت کی گئی ۔ آرمی چیف جنرل قمر جاوید باجوہ نے کہاکہ پاکستان اپنے آہنی برادر چین کے ساتھ دوستانہ تعلقات کو نہایت قدر کی نگاہ سے دیکھتا ہے۔ آئی ایس پی آر کے مطابق آرمی چیف نے کووڈ 19 وباء سے لڑنے اور ویکسین کی فراہمی پر چین کا شکریہ ادا کیا، چینی سفیر نے امن واستحکام کیلئے پاکستان کی کوششوں کی تعریف کی،چینی سفیر نے افغان مفاہمتی عمل پر پاکستان کے کردار کو سراہا۔