حیدرآباد(این این آئی)پیپلزپارٹی کے مرکزی سیکریٹری اطلاعات سینیٹر مولابخش چانڈیو نے کہا ہے کہ پی ڈی ایم کے قیام کے ساتھ ہی حکومت پیچھے ہٹنا شروع ہو گئی ہے ۔ایک بیان میں سینیٹر مولا بخش چانڈیو نے کہا کہ تاریخ گواہ ہے جو حکومت پیچھے ہٹی اسے شکست فاش ہوئی ہے ،

انہوں نے کہا کہ ابھی تو پی ڈی ایم نے تحریک شروع نہیں کی اور ابھی سے خان صاحب کے پائوں اکھڑ چکے ہیں ، انتقام ، نفرت اور علاقائیت کی جو سیاست کی جا رہی ہے اس کا انجام عوامی غیض و غضب ہی ہوگا۔ انہوں نے کہا کہ پنجاب کی مقبول قیادت پر غداری کے مقدمات اور سندھ کے جزائر پر قبضے کی سازشیں کی گئیں ، وزیر اعظم جو کچھ کر رہے ہیں یہ سیاست نہیں انتقام اور لوٹ مار ہے ،مہنگائی بیروزگاری اور ناقص پالیسیوں سے تنگ عوام اپوزیشن کے اتحاد کے منتظر تھے ، انہوں نے کہا کہ اپوزیشن کا اتحاد ہوتے ہی عوام نے حکمرانوں کو للکارنا شروع کر دیا ہے ، پی ڈی ایم کے قیام کی دو ہفتوں کے اندر حکومت میں تقسیم واضح ہو چکی ہے۔ سینیٹر مولابخش چانڈیو کا مزید کہنا تھا کہ عمران خان تنہا ہو چکے ہیں ، جو ان کا دفاع کرتے تھے وہی وزرا جلد ان پر زبانی حملے کریں گے ، وزیراطلاعات اپنی پیشرو مشیر اطلاعات کی طرح نوکری کیلئے سیاسی اخلاقیات کی حدیں پار کر گئے ہیں ، یہ لوگ جو مرضی کر لیں اب ان کی زبان درازیاں انہیں نہیں بچا پائیں گی، انہوں نے کہا کہ پی ڈی ایم کے پنجاب اور کراچی کے جلسوں کے بعد حکمرانوں کی دوڑیں دنیا دیکھے گی ۔

موضوعات:مولا بخش چانڈیو