اسلام آباد (این این آئی)وزیر اعظم کو بتایاگیاہے کہ گھروں کی خرید کے لئے فنانسنگ کا ماڈل اور اس ضمن میں ٹیکس رعایات کا کام تکمیل کے حتمی مراحل میں ہے جس کا جلد اعلان کر دیا جائیگا ، وفاقی سطح پر لاہور اور اسلام آباد میں پچیس ہزار ہاؤسنگ یونٹس کی تعمیر کا کام جلد شروع کر دیا کر دیا جائے جبکہ وزیر اعظم نے ہدایت کی ہے کہ ہاؤسنگ پراجیکٹ کی پیش رفت سے عوام کو مسلسل آگاہ رکھا جائے۔

جمعہ کو وزیر اعظم عمران خان کی زیرصدارت نیا پاکستان ہاؤسنگ پراجیکٹ میں اب تک ہونے والی پیش رفت کا جائزہ اجلاس ہوا جس میں صوبائی وزارء میاں محمود الرشید، علیم خان، چیئرمین ہاؤسنگ ٹاسک فورس ضیغم نقوی، سیکرٹری ہاؤسنگ ڈاکٹر عمران زیب خان و دیگر افسران شریک ہوئے ۔ وزیرِ اعظم نے نیا پاکستان ہاؤسنگ پراجیکٹ کو عملی جامہ پہنانے کے سلسلے میں کیے جانے والے قانونی اور انتظامی اقدامات کے حوالے سے اب تک کی پیش رفت سے آگاہ کیا۔ وزیرِ اعظم کو بتایا گیا کہ نیا پاکستان ہاؤسنگ اتھارٹی کے قیام کا کام تقریباً مکمل کیا جا چکا ہے رئیل اسٹیٹ ریگولیٹری اتھارٹی کے قیام کا بل ٹاسک فورس اور وزارتِ قانون کی منظوری سے حتمی شکل اختیار کر چکا ہے۔ گھروں کی خرید کے لئے فنانسنگ کا ماڈل اور اس ضمن میں ٹیکس رعایات کا کام تکمیل کے حتمی مراحل میں ہے جس کا جلد اعلان کر دیا جائیگا۔ وزیرِ اعظم کو فورکلوڑر لاز کے حوالے سے بھی پیش رفت سے آگاہ کیا گیا۔ اس موقع پر وزیر اعظم نے ہدایت کی کہ اٹارنی جنرل کی معاونت سے فورکلوڑر لاز کو حتمی شکل دی جائے۔ وزیر اعظم کو بتایا گیا کہ وفاقی سطح پر لاہور اور اسلام آباد میں پچیس ہزار ہاؤسنگ یونٹس کی تعمیر کا کام جلد شروع کر دیا کر دیا جائے ۔ صوبائی وزیرہاؤسنگ محمود الرشید کی جانب سے وزیرِ اعظم کو بتایا گیا کہ رینالہ خود، چشتیاں اور لودھراں میں بہت جلد ہاؤسنگ پراجیکٹ کا آغاز کر دیا جائے گا۔ بیرون ملک سے آنے والے سرمایہ کاروں کی رہنمائی اور معاونت کے لئے بورڈ آف انوسٹمنٹ میں ہاؤسنگ پراجیکٹ کے لئے خصوصی سیل کے قیام کا فیصلہ کیا گیا ۔وزیر اعظم نے ہدایت کی کہ ہاؤسنگ پراجیکٹ کی پیش رفت سے عوام کو مسلسل آگاہ رکھا جائے۔

موضوعات:نیا پاکستان ہاؤسنگ پراجیکٹ