ڈھاکہ (این این آئی)بنگلہ دیشی ٹیم کے کپتان اور آل راؤنڈر مشرفی مرتضیٰ آئندہ ماہ کے آخر میں شیڈول پارلیمانی انتخابات میں حصہ لیں گے، وہ رولنگ عوامی پارٹی کی طرف سے اپنے آبائی ضلع میں الیکشن لڑیں گے، بنگلہ دیش میں عام انتخابات 30 دسمبر کو ہوں گے۔ مشرفی نے سماجی رابطوں کی ویب سائٹ فیس بک پر اپنے پیغام میں کہا کہ مثبت سیاست کے بغیر ملکی ترقی ممکن نہیں، مجھے اس بات کی خوشی ہے کہ ملک کیلئے کچھ
کرنے کا موقع مل رہا ہے، کامیابی ملی تو عوام کی امیدوں پر پورا اترنے کیلئے سرتوڑ کوشش کروں گا۔ انہوں نے کہا کہ اس وقت تمام تر توجہ ویسٹ انڈیز کے خلاف سیریز پر مرکوز ہے، سیریز ختم ہونے کے بعد انتخابی مہم شروع کروں گا۔ انہوں نے کہاکہ ہو سکتا ہے کہ 2019ء ورلڈ کپ ان کے انٹرنیشنل کیریئر کا آخری ٹورنامنٹ ہو۔ مشرفی کو 36 ٹیسٹ، 199 ون ڈے اور 54 ٹی ٹونٹی میچز میں ملک کی نمائندگی کا اعزاز حاصل ہے۔
