اسلام آباد (این این آئی)پاکستان پیپلز پارٹی کی سینئر رہنماء اور وفاقی وزیر برائے ماحولیات سینیٹر شیری رحمن نے صدر مملکت ڈاکٹر عارف علوی کی جانب سے پنجاب اور خیبرپختونخوا اسمبلیوں کے ضمنی انتخابات کی تاریخ کو غیر آئینی اور غیر قانونی قرار دے دیا۔شیری رحمان نے ٹوئٹر پر جاری تھریڈ میں کہا کہ

صدر عارف علوی کی جانب سے دو صوبائی اسمبلیوں میں انتخابات کی تاریخ کا اعلان غیر آئینی اور غیر قانونی ہے۔انہوں نے آئین پاکستان کے مسودہ کے ایک عکس شئری کرتے ہوئے لکھا، الیکشن ایکٹ 2017کے آرٹیکل 57(1)کے مطابق صدر الیکشن کمیشن سے مشاورت کے بعد ہی عام انتخابات کی تاریخ کا اعلان کر سکتے ہیں۔انہوں نے لکھا کہ صدر صاحب جلد بازی الیکشن ایکٹ 2017کے آرٹیکل 57(1)کی بھی خلاف ورزی کر بیٹھے ہیں۔ الیکشن ایکٹ صدر کو الیکشن کمیشن سے مشاورت کے بعد ہی عام انتخابات کے اعلان کا اختیار دیتا ہے،صدر نے بغیر مشاورت کے دو صوبائی اسمبلیوں کے انتخابات کی تاریخ کا اعلان کر دیا ہے۔ انہوں نے کہا کہ آئین کے مطابق صوبائی انتخابات کا اعلان الیکشن کمیشن سے مشاورت کے بعد صوبے کے گورنر نے کرنا ہے، صدر نے نہیں۔ انہوں نے کہا کہ صدر عارف علوی عمران خان کی خوشنودی کے خاطر آئین اور قانون کی دھجیاں اڑا رہے ہیں، صدر کو اپنے عہدے اور اختیارات کا احترام کرنا چاہئے۔