راولپنڈی (این این آئی)سربراہ عوامی مسلم لیگ شیخ رشید احمد کی گرفتاری کے وقت پولیس اہلکار کو دھکا دینے کی ویڈیو سوشل میڈیا پر وائرل ہو رہی ہے۔رات دیر گئے پولیس نے شیخ رشید کو موٹر وے پر قائم نجی ہاؤسنگ سوسائٹی سے گرفتار کر کے تھانہ آبپارہ منتقل کیا تھا، پولیس کے مطابق شیخ رشید نشے کی حالت میں تھے
اور ان کے پاس سے اعلیٰ کوالٹی کی شراب بھی برآمد ہوئی۔اس حوالے سے سابق وزیر داخلہ شیخ رشید احمد نے کہا کہ میں خانہ کعبہ کی چھت پر گیا ہوں، میں نے روضہ رسول ؐپر حاضری دی ہے۔شیخ رشید احمد نے کہاکہ میں نے دیگر گناہ کیے ہوں گے لیکن کبھی شراب نہیں پی اور کبھی نشہ نہیں کیا، میں 16 مرتبہ وزیر رہا ہوں، مجھ پر کرپشن کا کوئی کیس نہیں، میری جان کوخطرہ ہے۔گرفتاری کے وقت کی شیخ رشید کی ایک ویڈیو وائرل ہو رہی ہے جس میں سابق وفاقی وزیر کو پولیس اہلکار کو دھکا دیے کر پیچھے ہٹاتے ہوئے اور برا بھلا کہتے ہوئے واضح طور پر دیکھا جا سکتا ہے۔ دوسری جانب پاکستان تحریک انصاف کے چیئرمین عمران خان نے سابق وزیر داخلہ شیخ رشید احمد کی گرفتاری کی مذمت کی ہے۔سماجی رابطے کی ویب سائٹ ٹوئٹر پر اپنے بیان میں عمران خان نے کہا کہ تاریخ میں کبھی اتنی متعصبانہ نگران حکومت نہیں آئی۔بتایا جائے کیا ملک عوام کے ایک اور احتجاج کا متحمل ہوسکتا ہے جس کی طرف اس وقت ہمیں دھکیلا جارہا ہے۔انہوں نے کہاکہ حکومت نے ملک کو پہلے ہی معاشی دیوالیہ کیا ہوا ہے۔