لاہور( این این آئی)صوبائی وزیر داخلہ عطا اللہ تارڑ کی زیر صدارت امن و امان اور ضمنی انتخابات کے دوران سکیورٹی صورتحال کے حوالے سے اجلاس منعقد ہوا ،امن و امان کی صورتحال کو یقینی بنانے کے لیے علی امین گنڈا پور اور مقبول گجر کے

پنجاب داخلے پر پابندی عائد کر دی گئی ۔عطا اللہ تارڑ نے کہا کہ اسلحہ رکھنا اور اس کی نمائش پر دفعہ 144 کا نفاذ عمل میں لایا جا چکا ہے،الیکشن کے دوران کسی کو اسلحہ رکھنے کی اجازت نہیںہوگی ۔اسلحہ سے پاک کمپین کے دوران پولیس نے بھاری مقدار میں اسلحہ برآمد کیا ۔انہوںنے کہاکہ دھاندلی کا الزام لگانے والے اب افسران کو دھمکیاں دینے پر اتر آئے ہیں،تحریک انصاف یقینی شکست دیکھ کر لوگوں کو بدامنی پر اکسا رہی ہے ۔امن و امان کی صورتحال کو یقینی بنانے کے لیے علی امین گنڈا پور اور مقبول گجر کے پنجاب داخلے پر پابندی عائد کر دی گئی ہے ۔پنجاب حکومت کواطلاعات تھیں اور الیکشن کمیشن کی طرف سے بھی خط موصول ہوا ہے کہ علی امین گنڈا پور اور مقبول گجر پنجاب میں پرتشدد کاروائیاں کرنا چاہتے ہیں ۔انہوںنے کہاکہ پنجاب میں پرامن ،صاف اور شفاف انتخابات کو یقینی بنایا جائے گا ،اسلحہ کے خلاف مکمل کریک ڈائون کیا جائے گا، بد امنی پھیلانے والے عناصر سے قانون آہنی ہاتھوں سے نمٹے گا ، تحریک انصاف کے مسلح جتھے اپنی سازش میں ناکام ہوں گے ۔