اسلام آباد (این این آئی) صدر مملکت عارف علوی نے عید الاضحٰی کے مبارک اور پر مسرت موقع پر پوری پاکستانی قوم اور عالم اسلام کو مبارک باد پیش کرتے ہوئے کہاہے کہ وطن عزیز معاشی لحاظ سے جن مشکل حالات سے دوچارہے اس میں ہمیں ایثار اور قربانی جیسے

جذبات کو بروئے کار لانے کی اشد ضرورت ہے۔قوم کے نام اپنے پیغام میں صدر مملکت نے کہاکہ میں عید الاضحٰی کے مبارک اور پر مسرت موقع پر پوری پاکستانی قوم اور عالم اسلام کو مبارک باد پیش کرتا ہوں۔انہوںنے کہاکہ میں اللہ تعالیٰ کے حضور دعاگو ہوں کہ وہ پاکستانی قوم اور پوری ملت اسلامیہ کی عبادات، حج اور قربانیاں قبول فرمائے۔آمین!۔ انہوںنے کہاکہ عیدالاضحٰی ہمیں اللہ تعالیٰ کے حکم پر حضرت ابراہیم ؑ اور حضرت اسماعیل ؑ کی تسلیم ورضا کی یاد دلاتی ہے، ان عظیم شخصیات کو اللہ تعالی ٰنے جب امتحان سے گزارا تو دونوں نے اللہ کے حکم پر سر تسلیم خم کر دیا۔ انہوںنے کہاکہ اللہ تعالیٰ کوان کا یہ جذبہ اس قدر پسند آیا کہ اسے قیامت تک ایمان والوں کے لئے عبادت کی حیثیت سے لازم قرار دے دیا۔ انہوںنے کہاکہ گویا کہ قربانی کی یہ عبادت اللہ تعالیٰ کی بارگاہ میں مومن بندے کی طرف سے اس عزم کا اظہار ہے کہ اس کی راہ میں بڑی سے بڑی قربانی اور ایثار کیلئے وہ ہمہ وقت تیار ہے۔ انہوںنے کہاکہ قربانی اور ایثار کا جذبہ عالمگیر اور آفاقی تاثیر کا حامل ہے، دنیا میں کوئی قوم اس وقت تک ترقی نہیں کرسکتی جب تک اس میں ایثار اور قربانی کا جذبہ موجود نہ ہو۔ انہوںنے کہاکہ قربانی صرف جانور ذبح کرنے کا نام نہیں بلکہ اس کا اصل مقصد نفسانی خواہشات کو اعلیٰ مقاصد کے حصول کے لئے قربان کرنا ہے۔انہوںنے کہاکہ یہ جذبہ انسان میں ایسی صلاحیت کو جنم دیتا ہے کہ

جس کی بدولت وہ بڑی سے بڑی مشکل صورت حال میں بھی راہ ِراست سے نہیں بھٹکتا۔انہوںنے کہاکہ وطن عزیز معاشی لحاظ سے جن مشکل حالات سے دوچارہے اس میں ہمیں ایثار اور قربانی جیسے جذبات کو بروئے کار لانے کی اشد ضرورت ہے۔عید الاضحٰی کے اس موقع پر پوری پاکستانی قوم کو اس عزم کا اعادہ کرنا ہے کہ ہم ذاتی مفاد، حرص، طمع ولالچ اور خود غرضی کی بجائے اخوت، ایثار، محبت اور غم خواری سے سرشار ہو کر اپنے ارد گرد

ضرورت مندوں اور بے سہارا لوگوں کی مدد کریں اور آزمائش کی اس گھڑی میں مضبوط قوم بن کر ابھریں گے۔انہوںنے کہاکہ اللہ تعالی ہم سب کا حامی وناصر ہو۔ آمین !۔وزیراعظم شہباز شریف نے بیرون ملک مقیم پاکستانیوں سمیت تمام امت مسلمہ کو عیدالاضحٰی کی مبارکباد دی ہے ۔وزیراعظم شہباز شریف نے سماجی رابطے کی ویب سائٹ ٹوئٹر پر اپنے بیان میں بیرون ملک مقیم پاکستانیوں سمیت امت مسلمہ کو عیدالااضحی کی مبارکباد دی ہے ۔وزیراعظم شہباز شریف نے کہا کہ یہ مقدس دن ایثار، قربانی اور اللہ تعالیٰ کی اطاعت کا پیغام ہے ۔وزیراعظم نے امت مسلمہ کو نادار اور مستحقین کی مدد کے لئے اجتماعی کردار ادا کرنے کی ضرورت پر زور دیا۔