لاہور( این این آئی) تحریک انصاف کے وائس چیئرمین و سابق وزیر خارجہ شاہ محمود قریشی نے کہا ہے کہ عمران خان کو نا اہل کرنے اور تحریک انصاف پر پابندی لگانے کی سازش کی جارہی ہے ،ملک کو بھنور سے نکالنا ہے تواس کا ایک ہی راستہ ہے کہ ملک میں

نئے انتخابات کرائے جائیں۔ مینا ر پاکستان جلسے میں خطاب کرتے ہوئے شاہ محمودقریشی نے جلسے کے شرکاء کو مخاطب کرتے ہوئے کہا کہ اسلام آبادمیں ایک نئی سازش تیاری کی جارہی ہے ، الیکشن کمیشن پاکستان میں ایک سازش گھڑی جارہی ہے ، فارن فنڈنگ کیس میں ہم نے ثبوتوں کے ساتھ مکمل جواب دیا، سب ٹی او آرز پر مطمئن کیا ۔ عدالت نے حنیف عباس کیس میں کہا کہ سب کا حساب کیا جائے ۔کیا (ن) لیگ اور پیپلز پارٹی سے حساب نہیں لینا ؟۔ ہم حساب دینے کیلئے تیار ہیں کیونکہ ہمارا دامن صاف ہے ،تحریک انصاف سے یکطرفہ حساب کیوں مانگا جارہا ہے ۔ ان کا ارادہ ہے یہ ایک نئی سازش کے ذریعے عمران خان کو نا اہل کرنا چاہتے ہیں تحریک انصاف پر پابندی لگانا چاہتے ہیں،کیا آپ اس سازش کو کامیاب ہونے دو گے ؟۔عقل کے اندھوںیہ مجمع دیکھو کیا تمہیں عمران خان تنہا نظر آرہا ہے ۔انہوںنے کہا کہ ملک کو بھنور سے نکالنا ہے تواس کا ایک ہی راستہ ہے کہ ملک میں نئے انتخابات کرائے جائیں۔