کوئٹہ(این این آئی) نجی ہسپتال میں گردے کی پتھری کا آپریشن کرانے کی غرض سے جانے والے غریب سرکاری ملازم کا ایک گردہ نکال لیا گیا۔بلوچستان اسمبلی میں درجہ چہارم کے ملازم سوئپر عمران مسیح نے بتایا کہ اسے گردے میں پتھری تھی جس کا آپریشن کرانے
وہ ائیر پورٹ روڑ پر واقع ایک نجی ہسپتال گیا جہاں اس کا آپریشن کیا گیا۔عمران مسیح کے مطابق کئی دنوں تک اس نجی ہسپتال کی انتظامیہ اپنے ہی خرچ پر ڈائیلاسز کرتی رہی اور ہسپتال والے از خود اسے گھر سے لاتے اور پہنچاتے رہے تاہم حالت مسلسل غیر ہوتی رہی جس پر اسے کراچی لے جایا گیا جہاں ڈاکٹرز نے انکشاف کیا کہ عمران مسیح کا ایک گردہ نہیں ہے ، دوسرا گردہ بھی کام نہیں کررہا۔ بلوچستان اسمبلی ایمپلائز یونین کے رہنما ظفر رند نے بتایا کہ ہسپتال انتظامیہ کے خلاف بجلی گھر روڑ پولیس تھانے میں مقدمے کے اندراج کے لیے کوششیں کررہے ہیں ، پولیس نے مقدمہ درج نہ کیا تو اسمبلی ایمپلائز یونین احتجاج کرے گی۔
