اسلام آباد (این این آئی) ترجمان دفتر خارجہ نے کہاہے کہ سامنے آنے والے حقائق افغان سفیر کی صاحبزادی کے بیان کے مطابق نہیں،امید ہے کہ افغانستان کی حکومت جلد ازجلد مطلوبہ معلومات اور رسائی فراہم کرے گی۔ اپنے بیان میں ترجمان دفتر خارجہ زاہد حفیظ چوہدری نے کہا کہ
افغانستان کی وزارت خارجہ کا بیان اورافغانستان کے سفیر کی صاحبزادی کی وڈیو دیکھی ہے،افغانستان کے وفد کو بتایا گیا تھا کہ تحقیقاتی حقائق افغان سفیر کی صاحبزادی کے بیان کی تصدیق نہیں کرتے۔ انہوں نے کہاکہ سامنے آنے والے حقائق افغان سفیر کی صاحبزادی کے بیان کے مطابق نہیں۔انہوں نے کہاکہ وفد سے افغانستان کے سفیر کی صاحبزادی تک رسائی کی درخواست کی گئی،وفد سے سفارت خانے اور فون ڈیٹا تک رسائی کی درخواست بھی کی گئی۔ترجمان دفتر خارجہ نے کہاکہ امید ہے کہ افغانستان کی حکومت جلد ازجلد مطلوبہ معلومات اور رسائی فراہم کرے گی۔ انہوں نے کہاکہ افغانستان کے وفد کو افغان سفیر کی صاحبزادی سے متعلق تمام حقائق سے آگاہ کیاگیا،افغان وفد کو ان تمام مقامات کا دورہ کرایا گیا جہاں افغان سفیر کی صاحبزادی16 جولائی کو گئی تھیں۔ انہوں نے کہاکہ افغان وفد کو ایف7، جی 7، راولپنڈی، دامن کوہ، ایف6 اور ایف 9 پارک کا دورہ کرایاگیا تھا،وفد کو جیو فنسنگ سمیت تمام ٹیکنیکل ڈیٹا دکھایا گیا تھا۔ انہوں نے کہاکہ ٹیکسی ڈرائیورز کے بیانات سے اس ڈیٹا کی تصدیق ہوئی۔
