ممبئی (این این آئی ) ہندوستان میں پاکستانی فنکاروں پر لگائی جانیوالی پابندی پر تقریباً ہر فنکار نے ہی اپنی رائے کا اظہار کیا ، تاہم اگر آج کل کسی کا منفرد بیان توجہ کا مرکز بن رہا ہے تو وہ سیف علی خان ہیں ، ایک انٹرویو میں سیف علی خان نے ہرزہ سرائی کرتے ہوئے کہا کہ

فواد خان جیسے پاکستانی اداکاروں کو ہندوستان میں اس قسم کی توجہ ملنے کی صرف ایک ہی وجہ ہے اور وہ یہ کہ انہیں ہندوستان میں کافی مختلف مانا جاتا ہے ، کیونکہ ان کا تعلق ایک ممنوعہ سرزمین سے ہے ۔ اگر یہ ہندوستانی اداکار ہوتے تو الگ سا گلیمر ان کے ساتھ نہ ہوتا، تب یہ بھی یہاں عام ہی مانے جاتے ۔ سیف علی خان کا کہنا تھا کہ مجھے اس پابندی کے بارے میں کچھ سمجھ نہیں آتا ایک طرف تو آپ ایک دوسرے کیساتھ اچھا تعلق رکھتے ہیں ، فلموں میں کاسٹ کرتے ہیں ، کرکٹ کھیلتے ہیں اور دوسری جانب کچھ اور ہی معاملات دکھائی دیتے ہیں ۔ انہوں نے مزید کہا دونوں ممالک کے درمیان بہت کچھ چل رہا ہے جس کا کسی کو معلوم نہیں ۔