ممبئی (ویب ڈیسک)بالی ووڈ اداکارہ سونم کپور اپنی خوبصورتی اور سٹائل کے حوالے سے جانی جاتی ہیں لیکن وہ اپنے پرستاروں کو فٹبال میں مہارت سے حیران کرنے والی ہیں۔ سونم نے اپنی فلم میں سلمان خان کے ساتھ فٹبال کھیل کر سب کو حیران کیا، یہ مناظر فلم کے ایک گانے میں شامل کئے گئے ہیں۔ سونم اور سلمان ان دنوں سورج برجاتیہ کی فلم پریم رتن دھان پیو میں اداکاری کر رہے ہیں۔ اس فلم کے ایک گانے میں سونم اور سلمان فٹبال کھیلتے دکھائی دیں گے۔ فلم کا میوزک ہمیش ریشمیا نے ترتیب دیا ہے اور اس میں ایک طویل ترین گانا شامل کیا گیا ہے جو بالی ووڈ کی تاریخ کا سب سے طویل گانا ہو گا۔ فلم کے کوریو گرافر احمد خان کے مطابق یہ گانا 13 منٹ تک چلے گا۔ گانے میں سلمان خان اور سونم کپور ایک شادی کی تقریب میں شریک ہیں جہاں دونوں کے درمیان فٹبال کا مقابلہ ہوتا ہے۔ گانا فلمبند کر لیا گیا ہے۔ سونم کپور نے چند روز تک فٹبال کے بنیادی رموز سے آگاہی حاصل کی تا کہ وہ گانے میں اچھا پرفارم کر سکیں۔ فلم کی شوٹنگ ان دنوں بھارت میں جاری ہے اور اسے رواں سال دسمبر میں ریلیز کئے جانے کا امکان ہے۔