ممبئی(نیوز ڈیسک)بالی ووڈ کے صفِ اول کے اداکاروں میں شمار ہونے والے عمران ہاشمی24مارچ کو 36برس کے ہوجائیں گے۔ 24مارچ 1979کو بھارتی ریاست مہارشٹرا کے شہر ممبئی میں پیدا ہونے والے عمران ہاشمی نے اپنے شوبز کیرئیر کا آغاز2002 میں بھٹ برداران کے فلمی بینر وشیش فلمز کی فلم راز سے بحیثیت اسسٹنٹ ہدایتکار کیا۔ بالی وڈ میں عمران کی آمد فلم فٹ پاتھ سے ہوئی جسے میں انکی کارکردگی کو ناقدین کی جانب سے بیحد پذیرائی ملی، تاہم رومانٹک تھرلر مرڈر انکی پہلی کامیاب فلم ثابت ہوئی، جس میں انکے مدِ مقابل ملائکہ شیراوت بطور ہیروئن جلوہ گر ہوئیں۔ اسکے بعد عمران نے پیچھے مڑ کر نہیں دیکھا اور زہر، عاشق بنایا آپ نے، اکثر، گینگسٹر، آوارہ پن، جنت، راز، ونس اپان اے ٹائم ان ممبئی، مرڈر ٹو، دی ڈرٹی پکچر، جنت ٹو، شنگھائی، راز تھری اور ایک تھی ڈائن جیسی کامیاب فلموں میں اپنی اداکاری کا لوہا منوا لیا۔ عمران ہاشمی کی آنے والی فلموں میں ا±نگلی، وائٹ لائیز، پاکستانی اداکارہ حمیمہ ملک کے ساتھ شاطر، مسٹر ایکس، ہماری ادھوری کہانی اور بدتمیز دل شامل ہیں، جن سے خود عمران سمیت ناقدین کو بھی بیحد ا±میدیں وابستہ ہیں۔