لاہور ( این این آئی) لاہور ہائیکورٹ کے مسٹر جسٹس قاسم خان نے وزیر اعظم عمران خان کی نا اہلی کیلئے دائر متفرق درخواست جسٹس شاہد وحید کو بھجوا دی ۔ ہائیکورٹ کے مسٹر جسٹس قاسم خان نے وزیر اعظم عمران خان کی نا اہلی کے لئے لائرز فائونڈیشن فار جسٹس کی آئینی درخواست پر سماعت کی جس میں وفاقی حکومت اور وزیر اعظم عمران خان نیازی کو فریق بنایا گیا ۔
جسٹس قاسم خان نے عمران خان کی نااہلی کیلئے درخواست جسٹس شاہد وحید کو بجھوا تے ہوئے کہا کہ جسٹس شاہد وحید اس درخواست پر سماعت کر رہے تھے۔عدالت نے درخواست پر کارروائی 18 اپریل تک موخر کر دی۔درخواست گزار نے موقف اختیار کر رکھا ہے کہ نواز شریف کے دور حکومت میں عمران خان سول نافرمانی کے لیے لوگوں کو اکسایا ہے، عمران خان نے لوگوں کو اکسایا کہ وہ ٹیکس نہ دیں اور بیرون ممالک سے رقوم بھی نہ بھیجیں، عمران خان نے حامیوں سمیت پارلیمنٹ کی بلڈنگ پر دھاوا بولا اور اور گیٹ توڑے، عمران خان نے ملکی سالمیت کے خلاف اقدامات کیے ہیں، عمران خان نے ملکی سیاسی نظام کو تباہ کرنے کی کوشش کی ہے۔ استدعا ہے کہ عدالت وزیر اعظم عمران خان کو آرٹیکل 62 ون جی کے تحت نا اہل کرے،عمران خان کے خلاف 124 اے کے تحت کاروائی کا حکم دے۔
