اسلام آباد (این این آئی)سپیکر خیبر پختونخوا اسمبلی اسد قیصر نے کرپشن الزامات پر وضاحت پیش کرتے ہوئے کہاہے کہ الزام لگایا گیا کہ میں نے 35 کروڑ کا بنگلہ بنایا ہے ،جو بھی میرا 35 کروڑ روپے کا بنگلہ ڈھونڈے گا اسے گفٹ کردوں گا۔ میڈیا سے بات چیت کے دور ان کرپشن الزامات کا جواب دیتے ہوئے سپیکر کے پی کے اسمبلی نے کہا کہ الزامات سے متعلق نیب نے مجھ سے رابطہ نہیں کیا ٗبنی گالہ میں میرا بھائی کرائے کے مکان
میں رہتا ہے اور میں گائوں میں اپنے ذاتی گھر میں رہتا ہوں۔اسد قیصر نے کہا کہ میری زمین بے نامی نہیں ہے الیکشن کمیشن میں ڈکلیئرڈ ہے ،میں نے 11 لاکھ روپے کا ٹیکس دیا اور بنی گالہ میں زمین کی رجسٹریاں میرے پاس موجود ہیں اور زمین کا رقبہ 5 کنال اور 11 مرلے ہے۔انہوں نے کہا کہ 2009 ء میں پانچ کنال دوقسطوں میں خریدی،اگر تمام الزامات ثابت ہوئے تو سیاست چھوڑ دوں گا۔ اسد قیصر نے کرپشن کے حوالے سے اپنے اوپر لگائے گئے تمام الزامات کو مسترد کرتے ہوئے کہا کہ انہوں نے اپنی کوئی جائیداد نہیں چھپائی ۔اسد قیصر نے کہا کہ تمام بھرتیاں قانون کے مطابق کیں اور نیب نے مجھ سے کوئی رابطہ نہیں کیا ۔
