اسلام آباد (این این آئی)وزیراعظم کے ترجمان ڈاکٹر مصدق ملک نے پاکستان تحریک انصاف پر زور دیا ہے کہ وہ اپنے دو نومبر کے احتجاج کیلئے حکومت سے باقاعدہ تحریری درخواست کر کے اجازت لے اور یہ یقین بھی دلائے کہ لاک ڈاؤن نہیں ٗ پرامن اور مخصوص جگہ پر احتجاج ہوگا۔ ایک انٹرویو میں انہوں نے کہا کہ ملک میں جمہوریت ہے اور جمہوری نظام میں پرامن احتجاج ہر شہری اور ہر سیاسی جماعت کا حق ہے جس سے کسی کو نہیں روکا جائے گا لیکن احتجاج کی آڑ میں فساد یا انتشار پھیلانے کی اجازت نہیں دی جا سکتی۔ انہوں نے کہا کہ گذشتہ روز راوالپنڈی میں ہونے والا شیخ رشید کا احتجاج بھی غیر قانونی تھا جس کی انہوں نے انتظامیہ سے کسی قسم کی کوئی اجازت نہیں لی تھی اور اسی وجہ سے ان کے خلاف کارروائی عمل میں لائی گئی۔ ترجمان وزیراعظم کا کہنا تھا کہ پی ٹی آئی یا کوئی اور سیاسی جماعت اگر حکومت سے باقاعدہ تحریری درخواست کے ذریعے احتجاج کی اجازت لے تو حکومت اسے نہیں روکے گی بلکہ اسے سیکیورٹی بھی فراہم کرے گی تاہم جب کوئی یہ کہے کہ میں تو نکلوں گا کیونکہ میں نے اعلان کر دیا ہے تو پھر قانون حرکت میں آئے گا۔ ایک سوال کے جواب میں انہوں نے کہا کہ دفاع پاکستان کے لوگوں نے اجازت لے کر جلسہ کیا، کسی بھی انتہا پسند جماعت کو جلسے جلوس کی اجازت نہیں دی جائے گی اور فورتھ شیڈول میں شامل افراد کو گرفتار کیا جائے گا۔ انہوں نے کہا کہ ہم نے رکاوٹیں عوام کے جان و مال کے تحفظ کو یقینی بنانے کیلئے لگائی ہیں اور اگر ہم یہ رکاوٹیں ہٹا لیں تو یہ لوگ پہلے کی طرح پھر حملہ آور ہوجائیں گے۔ ڈاکٹر مصدق ملک نے کہا کہ احتجاج کے دوران عوام کے جان و مال کے تحفظ کو یقینی بنانے کیلئے حکومت اپنے تمام وسائل بروئے کار لائے گی۔ ایک اور سوال کے جواب میں انہوں نے کہا کہ پی ٹی آئی کو چاہیے کہ وہ سپریم کورٹ جہاں اس نے کیس دائر کیا ہے اس کے فیصلے کا بھی انتظار کرے۔