اسلام آباد(آئی این پی )پاکستان تحریک انصاف کے چیئرمین عمران خان نے کہا ہے کہ راولپنڈی میں پولیس شیلنگ سے نومولود بچے کی ہلاکت پر صدمہ ہوا اس کی ذمہ دار پنجاب حکومت ہے۔جمعہ کو سوشل میڈیا کی ویب سائٹ ٹوئٹر پر اپنے ایک بیان میں عمران خان نے کہا کہ ہمیں نومولود کی ہلاکت پر صدمہ ہوااور بچے کی ہلاکت کی ذمہ دار پنجاب حکومت ہے، ہمیں عدالتی اجازت کے باوجود پرامن ریلی کی اجازت نہیں دی جارہی ہے جبکہ (ن) لیگ کے پی میں عوام کے پیسے سے ریلی کا انعقاد کرتی ہے ، عمران خان نے کہا کہ نام نہاد جمہوریت غائب ہوچکی ہے اور پی ٹی آئی کے کارکنان پرتشدد کر کے نوازشریف کا آمرانہ اقتدار ظاہر ہوگیا ہے ۔ دریں اثناء
ضلعی انتظامیہ کے ترجمان اور میڈیکل سپرنٹینڈنٹ بے نظیر بھٹو ہسپتال راولپنڈی ڈاکٹر آصف قادر میر نے کہا ہے کہ راولپنڈی میںآنسو گیس کی شیلنگ بچی کی موت کا باعث نہیں بنی ، انہوں نے واضح کیا کہ بچی کو سانس کی تکلیف صبح سے تھی جسے شام سوا چھ بجے بعد ہسپتال لایا گیا اس وقت تک بچی کی موت واقع ہو چکی تھی ۔ہسپتال میں ڈاکٹر نے آنسو گیس کے باعث دم گھٹنے کوموت کی وجہ قرار نہیں دیا ۔ ترجمان نے کہا کہ بچی کی رہائش گورڈن کالج کے علاقے میں ایک محلے میں تھی جو آنسو گیس کی زد میں نہیں تھا۔ انہوں نے کہاکہ بچی کے جاں بحق ہونے کے واقعہ کو زبردستی آنسو گیس کی شیلنگ سے جوڑا جا رہا ہے جس کا حقائق سے کوئی تعلق نہیں۔
