لاہور( این این آئی) وزیر اعلی پنجاب محمد شہباز شریف نے لاہو ر چیمبر آف کامرس اینڈ انڈسٹری کے زیر اہتمام ’’پرامن پاکستان، خوشحال پاکستان ‘‘ کے موضوع پر منعقدہ سیمینار کے دوران پرجوش انداز میں خطاب کیا اور اسلام آباد بند کرنے کے اعلان پر نیازی صاحب پر کڑی تنقید کرتے ہوئے کہا کہ جب پاکستان کے اندر سے ترقی اور خوشحالی کے خلاف سازشیں ہوں گی تو اس پر سب سے زیادہ خوش مودی ہو گا-اس موقع پر انہوںنے شعر کا یہ مصرعہ پڑھا:’’اس گھر کو آگ لگ گئی گھر کے چراغ سے‘‘۔ انہوں نے کہا کہ ایک لیڈرکا کام عوام کی رہنمائی کرنا ہوتا ہے نہ کہ انہیں گمراہ کرنا- افسوس کی بات ہے کہ نیازی صاحب نے دروغ گوئی اور جھوٹ کے بے بنیاد الزامات لگا ئے ہیں – پتا نہیں انہوں نے لیڈری کہاں سے سیکھی ہے – وزیر اعلی نے ایک موقع پر عمران خان کو ’’براؤن صاحب‘‘ کہہ کر مخاطب کیا اور کہا کہ انہیں تو اپنے صوبے کے پی کے کا علم نہیں کہ وہاں لوگ برف پوش پہاڑوں پر زندگی کیسے بسر کرتے ہیں – وزیراعلی نے کہا کہ پاکستان بند کرانے کا ناپاک منصوبہ وہی ہے جو ہماری مشرقی سرحد کے پار پاکستان کے ازلی دشمن کا ہے اور یہ لوگ پاکستان کے دشمن کے خوابوں کی تکمیل چاہتے ہیں اور اس سے بڑھا کوئی ظلم نہیں ہو سکتا – اس موقع پر وزیر اعلی نے ہال میں موجود ایک سکھ برادری سے تعلق رکھنے والے شخص کو دیکھ کر کہا کہ سرحد پار کے حوالے سے میں نے یہ بات سرداروں کے بارے نہیں کی بلکہ غیر سرداروں کے بارے میں کی ہے – ہماری سرداروں سے بڑی دوستی ہے جس پر ہال میں موجود سب لوگ مسکرا دیئے-وزیر اعلی نے کہا کہ مسائل جتنے بھی بڑے کیوں نہ ہوںاگر عزم ، جذبہ اور قوت ارادی مضبوط ہو تو سمندر یا پہاڑ بھی ان کی راہ میں حائل نہیں ہو سکتے-اس موقع پر انہوں نے یہ شعر پڑھا:ایک ہی صف میں کھڑے ہوگئے محمود و ایاز نہ کوئی بندہ رہا نہ کوئی بندہ نواز۔ وزیر اعلی کے پرجوش خطاب پر ہال میں موجود شرکاء نے کئی بار’’ قدم بڑھاؤ شہباز شریف …ہم تمہارے ساتھ ہیں ‘‘ کے نعرے لگائے-سیمینار کے دوران تاجر و صنعتکار روں کے نمائندوں نے موجودہ حکومت پر بھرپور اعتماد کا اظہار کرتے ہوئے 2 نومبر کو اسلام آباد بند کرنے کے اعلان سے مکمل لا تعلقی کا اظہار کیا-تاجر رہنما نعیم میر نے کہا کہ پاکستان کے تاجر آپ سے اس لئے محبت کرتے ہیں کہ آپ پاکستان سے محبت کرتے ہیں اور نیک نیتی سے عوام کی خدمت کر رہے ہیں – پنجاب یونیورسٹی میں سی پیک سٹڈی گروپ کے کنوینر ڈاکٹر حافظ ظفر نے چائنہ پاکستان اکنامک کوریڈور کی اہمیت اور پاکستان کی معیشت پر اس کے مثبت اثرات کے حوالے سے جامع بریفنگ دی اور بتایا کہ ایک سیمینار کے دوران مجھے ایک غیرملکی شخص نے کہا کہ اس منصوبے کی تکمیل مشکل لگتی ہے لیکن ایک شخصیت شہبازشریف پاکستان میں ہے جو سی پیک کو مکمل کرانے کی اہلیت اور صلاحیت رکھتی ہے۔