لاہور (آن لائن)قومی ائیر لائنز پی آئی اے نے مسافروں کی سہولت کے لئے لاہور اورکراچی کے درمیان دو اضافی پروازیں چلانے کا فیصلہ کیا ہے۔ ان پروازوں کا آغاز 30اکتوبر سے کیا جائے گا۔ اس سلسلے میں لاہور سے پہلی پرواز30اکتوبر کو سہ پہر 3بجے کراچی کے لئے روانہ ہوگی جبکہ کراچی سے لاہور آنے والی پرواز اس صبح11بجے لاہور پہنچے گی۔
یاد رہے کہ اس سے قبل پاکستان انٹرنیشنل ایئر لائنز (پی آئی اے ) نے بیرون ملک پروازوں کے کرایوں میں کمی کر دی۔ تفصیلات کے مطابق پی آئی اے نیبرطانیہ کے دو بڑے شہروں لندن اور برمنگھم کی پروازوں کیلئے کرایوں میں 20فیصد تک کمی کا اعلان کر دیا۔پی آئی اے ترجمان کا کہنا ہے کہ کرایوں میں کمی اکانومی کلاس کے مسافروں کیلئے کی گئی ہے تاہم رعایتی نرخوں پر ٹکٹ 30 نومبر تک لیے جا سکتے ہیں جس کے بعد یہ آفر ختم کر دی جائے گی۔واضح رہے کہ پاکستان انٹرنیشنل ایئرلائنز پی آئی اے نے مسافروں کو سام سنگ گلیکسی نوٹ سیون ساتھ لانے سے منع کردیا۔ اتوار کو ترجمان پی آئی اے کے مطابق مسافروں کے لئے ہدایات جاری کی گئی ہیں کہ وہ سام سنگ گلیکسی نوٹ سیون سفر کے دوران اپنے ساتھ نہ رکھیں ۔ دوسری طرف سام سنگ حکام کے مطابق گلیکسی نوٹ سیون میں چارجنگ کے دوران بیٹری پھٹنے کے بعد سے اس کی فروخت بند ہے۔

موضوعات:پی آئی اے