اسلام آباد (مانیٹرنگ ڈیسک) رواں ہفتے کے دوران ملک کے مختلف علاقوں میں مزید پری مون سون بارشوں کا امکان ہے۔ محکمہ موسمیات کی رپورٹ کے مطابق آئندہ 24گھنٹوں کے دوران ملک کے بیشتر علاقوں میں موسم گرم اور مرطوب رہے گا۔ تاہم گوجرانوالہ، لاہور، سرگودھا ،راولپنڈی، مالاکنڈ، ہزارہ، پشاور، کوہاٹ ڈویژن، اسلام آباد، فاٹا، کشمیر اور گلگت بلتستان میں چند مقامات پرجبکہ بہاولپور ڈویژن میں بعض مقامات پر تیز ہواؤں/آندھی اور گرج چمک کے ساتھ بارش امکان ہے۔رپورٹ کے مطابق گزشتہ24گھنٹوں کے دوران ملک کے بیشتر علاقوں میں موسم گرم اور خشک رہا۔ تاہم کشمیر اور فاٹا میں بعض مقامات پر گرج چمک کیساتھ بارش ہوئی۔ سب سے زیادہ بارش پارہ چنار میں 30ملی میٹر جبکہ گڑھی دوپٹہ 05، مظفرآباد میں 03 ملی میٹر ریکارڈ کی گئی۔ اتوار کر روز ملک میں سب سے زیادہ گرمی سبی میں پڑی جہاں زیادہ سے زیادہ درجہ حرارت 48 ڈگری سینٹی گریڈ تک پہنچ گیا جبکہ سکھر، جیکب آباد 47، بھکر، دادو، روہڑی، پڈعیدن اور موہنجوداڑو میں 46 ڈگری سینٹی گریڈ ریکارڈ کیا گیا۔