اسلام آباد (نیوز ڈیسک)سابق امریکی صدر ڈونلڈ ٹرمپ نے ایک بار پھر پاکستان اور بھارت کے درمیان جاری دیرینہ مسئلہ کشمیر پر ثالثی کی خواہش ظاہر کی ہے۔ ان کا کہنا ہے کہ وہ دونوں ممالک کے درمیان کشیدگی کم کرنے اور مسائل کے پرامن حل کے لیے اپنا کردار ادا کرنے کو تیار ہیں۔واشنگٹن میں میڈیا سے گفتگو کرتے ہوئے ٹرمپ نے دعویٰ کیا کہ انہوں نے پاکستان اور بھارت کو جوہری جنگ کی جانب بڑھنے سے روکا۔

ان کے بقول، “میں نے دونوں ملکوں سے کہا کہ پہلے جنگ روکو، تجارت بعد میں ہوگی۔ انہوں نے میری بات سنی، جنگ بند ہوئی اور اب ہم تجارتی معاملات پر بات کر رہے ہیں۔”ڈونلڈ ٹرمپ کا مزید کہنا تھا کہ کشمیر پر دونوں ممالک کی دشمنی کو ختم ہونا چاہیے، اور وہ اس میں ثالثی کرنے کی مکمل صلاحیت رکھتے ہیں۔ “میں نے دونوں فریقین سے کہا کہ آپ مسئلہ کشمیر پر بہت دیر سے ایک دوسرے کے مخالف ہیں، آئیں اسے ختم کریں”، انہوں نے کہا۔امریکی محکمہ خارجہ کی سابق ترجمان ٹیمی بروس نے بھی امید ظاہر کی کہ ٹرمپ اپنے دور صدارت میں کشمیر جیسے اہم تنازعے کو حل کرنے میں کامیاب ہو سکتے ہیں۔ ان کا کہنا تھا، “ٹرمپ وہ شخصیت ہیں جنہوں نے ایسے افراد کو بات چیت پر آمادہ کیا جن کے بارے میں تصور بھی نہیں کیا جا سکتا تھا۔

“قابلِ ذکر بات یہ ہے کہ ٹرمپ پہلے بھی متعدد بار پاک بھارت کشیدگی میں کمی کی بات کر چکے ہیں۔ ان کے ان بیانات پر اکثر بھارتی حکومت ناراض ہو جاتی ہے، جبکہ بھارتی اپوزیشن جماعتیں خصوصاً کانگریس، وزیر اعظم نریندر مودی کو طنز کا نشانہ بناتی ہیں۔یاد رہے کہ 10 مئی کو ٹرمپ نے اپنے سوشل میڈیا پلیٹ فارم “ٹروتھ سوشل” پر یہ دعویٰ بھی کیا تھا کہ پاکستان اور بھارت جنگ بندی پر راضی ہو چکے ہیں۔