اسلام آباد (صباح نیوز) نیب کے زیر حراست آصف زرداری اور سعد رفیق قومی اسمبلی کا اجلاس نہ ہونے کے باوجود بھی رواں ماہ جولائی میں پارلیمنٹ ہائوس آتے رہیں گے، متعلقہ قائمہ کمیٹیوں میں ان کی شرکت کیلیے پروڈکشن آرڈر جاری کردیے گئے ۔ آصف زرداری 3 جولائی کو اطلاعات و نشریات اور صنعت و پیداوار کی قائمہ کمیٹیوں، 8 اور 9 جولائی کو 2 روزہ اجلاس میں شریک ہوں گے، قائمہ کمیٹیوں کے چیئرمینوں نے پروڈکشن آرڈر جاری کردیے۔
آصف زرداری مزید بھی قائمہ کمیٹیوں کے رکن ہیں جن کے اجلاس طلب کیے جانے کے نوٹسز جاری کیے جا رہے ہیں۔علاوہ ازیں سعد رفیق کو آج پارلیمنٹ ہائوس میں قانون و انصاف کی قائمہ کمیٹی کے اجلاس میں شرکت کیلیے لایا جائے گا، یہ اجلاس 3 جولائی تک جاری رہے گا۔ 5 جولائی کو قائمہ کمیٹی برائے ریلوے کے اجلاس میں شریک ہوں گے۔ قائمہ کمیٹی قانون و انصاف کے چیئرمین نے سعد رفیق کی شرکت کو یقینی بنانے کی ہدایت کردی۔
