نئی دہلی (آئی این پی) بھارت اور پاکستان کے ڈی جی ایم اوز کے درمیان رابطہ ہوا ہے جس میں کنٹرول لائن کی موجودہ صورتحال پر تبادلہ خیال کیا گیا ،دونوں فریقین نے جنگ بندی معاہدے کو برقرار رکھنے پر اتفاق کیا۔پیر کو بھارتی میڈیا کے مطابق بھارت کے ڈائریکٹر جنرل ملٹری آپریشنز لیفٹیننٹ جنرل اے کے بھٹ اور انکے پاکستانی ہم منصب میجر جنرل ساحر شمشاد مرزا کے درمیان ٹیلی فونک رابطہ ہوا
جس میں کنٹرول لائن کی موجودہ صورتحال پر تبادلہ خیال کیا گیا ۔ددنوں فریقین نے سرحد پر جنگ بندی معاہدے پر کار بند رہنے پر اتفاق کیا۔بھارتی فوج کے ذارئع کا کہنا ہے کہ دونوںممالک کے ڈی جی ایم اوز کے درمیان بات چیت صبح ساڑھے دس بجے پاکستانی ڈی جی ایم او کی درخواست پر ہوئی ۔ بھارتی ڈی جی ایم اولیفٹیننٹ جنرل اے کے بھٹ نے سرحد پر امن وسکون کو یقینی بنانے کے اپنے عزم کا اظہا رکیا۔ذرائع کے مطابق پاکستانی ڈی جی ایم او میجر جنرل ساحر شمشاد مرزا نے بھارتی فوج کی جانب سے کنٹرول لائن پر بلا اشتعال فائرنگ اور شہریوں کے قتل عام کا معاملہ بھی اٹھایا۔واضح رہے کہ حالیہ دنوں میں بھارت کی جانب سے لائن آف کنٹرول پر سیز فائر کی خلاف وززیوں میں اضافہ ہوا ہے ،بھارتی فوج کی فائرنگ سے متعدد شہری شہید اور زخمی ہوچکے ہیں۔گزشتہ روز پاک فوج نے بھارتی فوج کے کنٹرول لائن پر بنکرز تباہ کرنے کی ویڈیو بھی جاری کی تھی ۔
