نیو یارک(مانیٹرنگ ڈیسک) پاکستان اقوام متحدہ کی جنرل اسمبلی کی انسانی حقوق کونسل کا دو سال کیلئے چوتھی بار رکن منتخب ہوگیا، امریکہ اور اس کے اتحادیوں کی مخالفت کے باجود پاکستان کو دوتہائی اکثریت سے منتخب کیا گیا۔تفصیلات کے مطابق پاکستان کو اقوام متحدہ کی جنرل اسمبلی کی انسانی حقوق کونسل کے

رکن کی حیثیت سے دو سال2018-20کیلئے منتخب کیا گیا ہے۔پاکستان چوتھی بارانسانی حقوق کونسل کارکن منتخب ہوا ہے، انتخاب میں پاکستان کو دوتہائی اکثریت سے منتخب کیا گیا، اقوام متحدہ میں پاکستان کی مستقل مندوب ملیحہ لودھی نے پاکستان پراعتماد کا اظہار کرنے پرعالمی برادری کا شکریہ ادا کیا ہے۔ان کا کہنا ہے کہ یہ فتح اقوام متحدہ میں پاکستان کے کردارکی توثیق ہے،امریکا اور اس کے اتحادی ممالک کی مخالفت کے باوجود پاکستان نے یہ کامیابی حاصل کی ہے، یہ پاکستان کے حق میں اعتماد کاووٹ ہے۔اقوام متحدہ میں مستقل مندوب ملیحہ لودھی کا کہنا تھا کہ انسانی حقوق کونسل کارکن منتخب ہونا پاکستان کی بڑی کامیابی ہے، جو ممالک سمجھتے تھے کہ پاکستان تنہائی کاشکار ہو اور رکن منتخب نہ ہو ان کے پروپیگنڈے کو شکست ہوئی۔اس موقع پر دیگر ممالک کے سفیروں نے ملیحہ لودھی کو مبارک باد پیش کی، پاکستان کے علاوہ ایشیا بحرالکاہل ریجن سے ا فغانستان، نیپال اورقطر بھی اقوام متحدہ کی انسانی حقوق کونسل کا رکن منتخب ہوئے ہیں۔علاوہ ازیں دفتر خارجہ کے ترجمان کا کہنا ہے کہ پاکستان کی رکنیت سے انسانی حقوق کے قومی اور عالمی ایجنڈے کیلئے ہمارے کردار اورخدمات پر عالمی برادری کا اعتماد ظاہر ہوتا ہے۔

موضوعات:اقوام متحدہ امریکہ بھارت پاکستان