کراچی (آن لائن)کراچی میں متعین ایران کے قونصل جنرل احمد محمدی نے کہا ہے کہ ایران پاکستان کو 3ہزار میگاواٹ بجلی کی فراہمی کیلئے تیار ہے جبکہ قبل ازیں پاکستان ایران سے ایک ہزار میگاواٹ بجلی حاصل کر رہا ہے۔ریڈیو تہران کے مطابق انہوں نے ان خیالات کا اظہار ایران کے اسلامی انقلاب کی 38ویں سالگرہ کے موقع پر ایک تقریب سے خطاب کرتے ہوئے کیا۔انہوں نے کہا

کہ پاک ایران گیس پائپ لائن کا منصوبہ پاکستان میں توانائی کی ضروریات کو پورا کرنے کے لئے ایک کم خرچ، محفوظ اور موثر ذریعہ ہے۔انہوں نے کہا کہ دونوں ممالک پاک ،ایران گیس پائپ لائن منصوبہ کی تکمیل کے لئے پر عزم ہیں۔انہوں نے کہا کہ ایران کی خارجہ پالیسی کے تحت ہمسایہ ممالک سے دوستانہ تعلقات کا فروغ ہے جبکہ نہ صرف ایران پاکستان کو،اپنا ہمسایہ بلکہ برادر ملک سمجھتا ہے اور ایران کی خارجہ پالیسی میں پاکستان کو نمایاں اہمیت دی جاتی ہے۔انہوں نے کہا کہ ایران پاکستان کو ایک ہزار میگاواٹ بجلی فراہم کر رہا ہے جبکہ اس میں 3ہزار میگاواٹ تک کا اضافہ کیا جا سکتا ہے۔ایرانی قو نصل جنرل نے کہ پاک ایران گیس پائپ لائن کا منصوبہ بنیادی اہمیت کا حامل ہے اور اس سے دونوں برادر ہمسایہ ممالک کے دوطرفہ اقتصادی رابطوں میںمزید اضافہ ہو گا۔