نئی دہلی (آئی این پی) بھارت نے پاکستان، بنگلہ دیش اور افغانستان سے آنے والے ہندوسمیت دیگر اقلیتوں کے افراد کو اپنی شہریت دینے میں آسانیاں پیدا کرنے کے لیے رجسٹریشن فیس میں کمی کردی۔بھارتی اخبار ’’ٹائمز آف انڈیا ‘‘کی رپورٹ کے مطابق وزارت داخلہ سے جاری اعلامیے میں کہا گیا ہے کہ یہ نیا قانون پاکستان، بنگلہ دیش اور افغانستان سے آنے والی اقلیتی برادریوں پر لاگو ہوگا۔رجسٹریشن فیس کو 15 ہزار روپے سے کم کر کے ایک سو روپے کردیا گیا ہے۔قانون میں تبدیلی سے ہمسایہ ممالک سے منتقل ہونے والے اقلیتی اراکین کوبھارتی حکومت کے اہلکاروں کے سامنے انڈین شہری کی حیثیت سے تابعداری کا حلف اٹھانے کو ممکن بنائیگا۔دیگر ممالک سے آنے والے اقلیتی اراکین کو انڈیا میں رجسٹریشن کے لیے 10 ہزاربھارتی روپے اور دیگر جگہوں میں رجسٹریشن کے لیے 15 ہزار روپے فیس ادا کرنی ہوگی۔بھارتی اخبار کی رپورٹ میں مزید کہا گیا ہے کہ 2009 کے شہریت کے قانون کی شقوں میں ترمیم کرکے نئی تبدیلیاں متعارف کرادی گئی ہیں۔خیال رہے کہ نئی دہلی نے گزشتہ سال اعلان کیا تھا کہ 31 دسمبر 2014 سے قبل پاکستان اور بنگلہ دیش سے قانونی طور پر بھارت میں داخل ہونے والے اقلیتی اراکین اپنے کاغذات کی گم شدگی کے باوجود ملک میں رہ سکتے ہیں۔
آج کی سب سے زیادہ پڑھی جانے والی خبریں
