اسلام آباد (مانیٹرنگ ڈیسک) بھارت کی مشہور ترین شیرنی 19 سالہ مچھلی کا انتقال ہو گیا۔ ’رانتھمبور کی رانی‘ کے نام سے مشہور مچھلی دنیا کے ان چند شیروں میں شامل تھی جن کی سب سے زیادہ تصاویر اتاری گئی ہیں۔اس کے چہرے کے بائیں جانب مچھلی کی شکل کا کافی واضح نشان تھا۔وہ کئی دستاویزی فلموں کا حصہ بنی اور اس کی ایک 14 فٹ لمبے مگر مچھ کے ساتھ لڑائی کی ویڈیو نے دیکھنے والوں کو حیران کر دیا۔مچھلی رانتھمبور کے نیشنل پارک آنے والے سیاحوں کے لیے بے حد پر کشش تھی۔ریاست راجستھان کے حکام کے مطابق مچھلی پارک کی سرحد کے ساتھ بھوکی پڑی ملی، اس نے کئی دن سے کچھ نہیں کھایا تھا۔رانتھمبور میں شیروں کے منصوبے کے ڈائریکٹر یوگیش کمار ساہو نے خبر رساں ادارے اے ایف پی کو بتایا کہ ’ہم اسے بچانے کے لیے علاج کر رہے تھے لیکن وہ جانبر نہ ہو سکی۔ ماہرین کے مطابق یہ اس کی عمر کے حساب سے طبعی موت ہے۔‘پارک کی ویب سائٹ کے مطابق مچھلی حالیہ برسوں میں کافی سست ہو گئی تھی اور اس کے لگ بھگ سبھی دانت گر چکے تھے۔مچھلی کے مرنے کی خبر انڈیا کے میڈیا میں بڑی خبر کے طور پر لی گئی اور اس کے مداحوں نے سوشل میڈیا پر اسے خراج عقیدت پیش کیا۔ رپورٹ کے مطابق دنیا بھر کے شیروں کے نصف شیر انڈیا میں پائے جاتے ہیں جو آخری اندازوں کے مطابق 2226 ہیں۔

موضوعات:شیرنی