اسلام آباد(نیوزڈیسک )آپ نوکری کے حصول کے لیے کیا کچھ کر سکتے ہیں؟ کیا آپ کسی موذی جانور کو بوسہ دے سکتے ہیں؟؟چین کی ایک کمپنی نے نوکری کے لیے انٹرویو دینے آنے امیدواروں کے لیے ایسی ہی انوکھی، کڑی اور جان لیوا شرط رکھ دی ۔ چینی شہر گوآنگ ژو کی ایک کمپنی نے انٹرویو میں امیدواروں کے ہمت و حوصلے کا امتحان لینے کے لیے انہیں ایک مگرمچھ کا بوسہ لینے کو کہہ دیا۔چینی اخبار پیپلز ڈیلی آن لائن کے مطابق کمپنی کو 9سیلز ایگزیکٹوز کی ضرورت تھی جس کے لیے اس نے اشتہار دیا تھا۔ کمپنی کے عہدیدارانٹرویو کے لیے آئے امیدواروں کو لے کر باہر گلی میں آ گئے جہاں انہیں ایک چھوٹے سے مگر مچھ کو بوسہ دینے کو کہا لیکن امیدواروں کی خوش قسمتی یہ تھی کہ مگرمچھ کے جبڑے باندھ دیئے گئے تھے اور وہ کاٹنے کے لیے منہ نہیں کھول سکتا تھا۔ یہ انٹرویو کا پہلا مرحلہ تھا، جن امیدواروں نے مگرمچھ کو بوسہ دے دیا انہیں نہ صرف انٹرویو کے اگلے مرحلے تک رسائی مل گئی بلکہ انہیں کمپنی کی طرف سے 1ہزار یوآن (تقریبا ساڑھے 16ہزار روپے)بھی دیئے گئے۔اگرچہ کئی مرد امیدواروں نے مگر مچھ کو بوسہ دینے کی حامی بھری لیکن کمپنی نے انہیں مسترد کر دیا، کمپنی حکام کا کہنا تھا کہ وہ خواتین ملازمین کی تلاش میں ہیں جو خوبصورت اور عقل مند بھی ہوں۔کمپنی کے ایک عہدیدار کا کہنا ہے کہ مگر مچھ کو بوسہ دینے کی شرط شاید بہت سے لوگوں کو عجیب لگے لیکن وہ یہ جان کر مطمئن ہو جائیں گے کہ کمپنی مگرمچھوں کی صحت کے لیے مصنوعات بناتی ہے اور چاہتی ہے کہ جن لوگوں نے وہ مصنوعات فروخت کرنی ہیں کیریئرمیں ان کا مگرمچھوں سے واسطہ بھی پڑ سکتا ہے،مگرمچھ کو بوسہ دینے کی شرط نوکری کے آغاز میں ہی امیدواروں کے دل سے مگرمچھوں کا خوف زائل کرنے ایک کوشش ہے۔