نیویارک(نیوزڈیسک )سوشل میڈیا پر ٹیوب میں موجود بچے کی ایک تصویر نے لوگوں کو کئی دن سے حیران کر رکھا ہے، صارفین کا اس کے متعلق خیال ہے کہ سائنسدان ٹیسٹ ٹیوب بے بی پیدا کرنے میں کامیاب ہو گئے ہیں اور یہ پہلا بچہ ہے جو ٹیسٹ ٹیوب بے بی ہے۔
صارفین کے دھوکا کھانے کا جواز بھی بنتا ہے کیونکہ اس تصویر کو سوشل میڈیا پر شیئرکرنے والے شخص نے اس کے نیچے یہی لکھا ہے کہ یہ دنیا کا پہلا ٹیسٹ ٹیوب بے بی ہے۔ تصویر میں دکھایا گیا ہے کہ پلاسٹک کی ایک ٹیوب میں ایک بچہ پھنسا ہوا ہے جو اپنی گول مٹول آنکھوں سے حیرت کے ساتھ باہر کا منظر دیکھ رہا ہے۔
دراصل یہ کوئی ٹیسٹ ٹیوب بے بی نہیں بلکہ ایک ایکسرے مشین ہے جو خاص طور پر بچوں کا ایکسرے لینے کے لیے بنائی گئی ہے۔ اس مشین کا نام پگ او سٹیٹ ہے اور یہ 1960میں ایجاد کی گئی تھی۔ مینوفیکچررز کا کہنا ہے کہ یہ مشین بچوں کے تمام امراض کی تشخیص کو مدنظر رکھ کر بنائی گئی ہے اور بچوں کی بیماریوں اور ان کے علاج کے حوالے سے یہ مشین آل اِن ون کی حیثیت رکھتی ہے۔
سوشل میڈیا پر یہ تصویر پوسٹ کرنے والے شخص کا نام بریٹ سٹار ہے جو ایک ہسپتال میں کام کرتا ہے۔ اس کا کہنا تھا کہ میں ہسپتال میں کام کے دوران دن میں کئی بار اس مشین کو دیکھتا تھا، فی الحقیقت مجھے بھی نہیں معلوم تھا کہ یہ مشین کس کام میں استعمال ہوتی ہے۔ ایک دن میں نے یونہی اپنے موبائل فون سے تصویر بنائی اور ریڈٹ پر پوسٹ کر دی۔ میں نے تو مذاق میں یہ تصویر پوسٹ کی تھی اور میں کبھی نہیں سوچ سکتا تھا کہ یہ تصویر سوشل میڈیا پر اس قدر تہلکہ خیز ثابت ہو گی۔