پشاور(مانیٹرنگ ڈیسک) صوبہ خیبر پختونخواہ میں پہلے برن اینڈ ٹراما سینٹر کا افتتاح کردیا گیا، 2.6 ارب روپے کی لاگت سے بننے والا سینٹر 120 بستروں پر مشتمل ہے۔ تفصیلات کے مطابق وزیر اعلیٰ خیبر پختونخواہ نے صوبے کے پہلے برن اینڈ ٹراما سینٹر کا افتتاح کردیا۔

اس موقع پر وزیر اعلیٰ کا کہنا تھا کہ سینٹر میں 120 بستر ہیں۔ لوگ تنقید کر رہے تھے کہ صوبے میں یہ سہولت نہیں۔ وزیر اعلیٰ نے کہا کہ سارا کام ہمارے دور میں ہوا تو یہ منصوبہ مکمل ہوا۔ انہوں نے پارٹی قیادت سے اپنے اختلافات کی تردید کرتے ہوئے کہا کہ افواہیں پھیلائی جارہی تھیں کہ میں نے ناراض ہو کر کام چھوڑ دیا ہے۔ صوبائی وزیر صحت ہشام انعام اللہ نے صحافیوں سے گفتگو کرتے ہوئے کہا کہ تقریباً 2 ہزار مریضوں کا یہاں علاج ہوا، ’آپ لوگ تنقید ضرور کریں لیکن مثبت تنقید کریں‘۔ خیال رہے کہ پختونخواہ کے اس برن سینٹر کا قیام یو ایس ایڈ کی معاونت سے عمل میں آیا ہے، اس سلسلے میں یو ایس ایڈ اور نیشنل ڈیزاسٹر مینجمنٹ اتھارٹی (این ڈی ایم اے) کے درمیان رواں برس جنوری میں معاہدہ طے پایا تھا۔ ترجمان صوبائی حکومت کے مطابق برن سینٹر 20 کنال پر مشتمل ہے جبکہ منصوبے پر کل 2.6 ارب روپے لاگت آئی ہے۔