ممبئی(این این آئی) بالی ووڈ میں چھوٹے نواب کے نام سے پہچانے جانے والے سیف علی خان اب ولن کے روپ میں سامنے آئیں گے۔بھارتی میڈیا کے مطابق سیف علی خان نئے سال میں ایک نئے چیلنج کے ساتھ سامنے آرہے ہیں جس میں وہ تاریخی شخصیت مراٹھا جنگجو ’تاناجی مرسوری‘ کی سوانح حیات پر بننے والی فلم ’تاناجی‘ میں ولن کا کردار ادا کریں گے جب کہ اس فلم میں سیف کے مدمقابل نامور اداکار اجے دیوگن مرکزی کردار نبھاتے
نظر آئیں گے۔فلم کے ہدایت کار اوم راوت تین دن قبل فلم کا پوسٹر بھی جاری کر چکے ہیں۔ اپنے کردار کے حوالے سے سیف علی خان نے تصدیق کرتے ہوئے کہا کہ ’میں اس فلم میں جذباتی ولن ادھے بان سنگھ راٹھور کا کردار ادا کر رہا ہوں۔واضح رہے کہ فلم ’تاناجی‘ کو ٹی سیریز کے تعاون سے فلمایا جائے گا جس میں اوم راؤت ہدایت کاری کا جادو جگائیں گے اور یہ فلم ’تاناجی‘ اگلے سال نومبر میں سنیما گھروں کی زینت بنے گی۔
