اسلام آباد (نیوز ڈیسک) کویت کی وزارت داخلہ نے انٹری ویزوں اور لیو پرمٹس سے متعلق اہم تبدیلی کا اعلان کرتے ہوئے واضح کیا ہے کہ
یکم ستمبر 2026 سے خودکار توسیع کی سہولت ختم کردی جائے گی اور ویزوں و اجازت ناموں کے لیے معمول کے قانونی قواعد دوبارہ نافذ ہوں گے۔
غیر ملکی میڈیا رپورٹس کے مطابق نئی پالیسی کے تحت کویت میں موجود افراد کے وزٹ ویزوں کی خودکار توسیع کا سلسلہ بھی یکم ستمبر سے ختم ہوجائے گا۔ اس کے بعد ویزوں کی مدت اور توسیع کا عمل مقررہ قوانین اور ضوابط کے مطابق ہوگا۔
وزارت داخلہ کے مطابق بیرون ملک موجود غیر ملکی شہریوں کے لیو پرمٹس کی عام مدت بھی بحال کردی جائے گی۔ تاہم جو افراد 31 اگست 2026 یا اس سے پہلے کویت سے روانہ ہوچکے ہوں گے، انہیں موجودہ قواعد کے تحت اضافی اور استثنائی توسیع کی سہولت حاصل رہے گی۔
وزارت نے تارکین وطن کو ہدایت کی ہے کہ وہ اپنی واپسی کی تاریخ کے حوالے سے محتاط رہیں۔ حکام کے مطابق ’سہل‘ (Sahel) ایپ کے ذریعے جاری کیا جانے والا ’ریذیڈنسی پرمٹ اسٹیٹس سرٹیفکیٹ‘ ہی لیو پرمٹ کی میعاد جانچنے کے لیے سرکاری دستاویز تصور ہوگا۔
اس لیے بیرون ملک موجود غیر ملکی شہریوں کو چاہیے کہ وہ مذکورہ سرٹیفکیٹ پر درج تاریخ کو مدنظر رکھتے ہوئے مقررہ مدت کے اندر کویت واپس پہنچیں، تاکہ ویزا یا رہائشی اجازت نامے سے متعلق کسی قانونی مشکل کا سامنا نہ کرنا پڑے۔
