اسلام آباد (نیوز ڈیسک)پاکستان تحریک انصاف کے چیئرمین بیرسٹر گوہر علی خان نے قومی اسمبلی میں متحدہ عرب امارات میں مقیم
پاکستانیوں کو درپیش ویزا مسائل کا معاملہ اٹھاتے ہوئے حکومت سے فوری طور پر اس مسئلے کا نوٹس لینے کا مطالبہ کیا ہے۔
قومی اسمبلی کے اجلاس میں اظہار خیال کرتے ہوئے بیرسٹر گوہر نے کہا کہ متحدہ عرب امارات میں بڑی تعداد میں پاکستانی روزگار، تجارت اور کاروبار سے وابستہ ہیں اور وہاں مقیم پاکستانی ملک کے لیے زرمبادلہ حاصل کرنے کا اہم ذریعہ ہیں۔ تاہم حالیہ عرصے میں پاکستانی شہریوں کو ویزوں کے حوالے سے مشکلات کا سامنا ہے اور کئی ایسے افراد کے ویزوں کی تجدید نہیں کی جا رہی جو پہلے ہی ختم ہوچکے ہیں۔
انہوں نے کہا کہ مسئلہ صرف ان پاکستانیوں تک محدود نہیں جو چھٹیوں کے باعث پاکستان میں موجود ہیں، بلکہ یو اے ای میں رہنے والے بعض شہری بھی اس صورتحال سے متاثر ہو رہے ہیں۔ ان کے مطابق کچھ فعال ویزے بھی منسوخ کیے جانے کی اطلاعات ہیں، جس سے متحدہ عرب امارات میں کاروبار کرنے والے پاکستانیوں کو مالی نقصان اٹھانا پڑ رہا ہے۔
پی ٹی آئی چیئرمین کا کہنا تھا کہ ویزا مسائل کے باعث پاکستانی تاجروں کے کاروبار متاثر ہو رہے ہیں اور بعض افراد کی لاکھوں ڈالر کی سرمایہ کاری بھی مشکلات میں پھنس گئی ہے۔ انہوں نے حکومت پر زور دیا کہ وہ متعلقہ حکام کے ساتھ فوری طور پر یہ معاملہ اٹھائے تاکہ متاثرہ پاکستانیوں کے مسائل حل ہوسکیں۔
بیرسٹر گوہر نے دعویٰ کیا کہ انہیں اس معاملے سے متعلق قابلِ اعتماد اطلاعات موصول ہوئی ہیں اور ان کی جماعت سے وابستہ ایک کارکن عبدالعزیز، جو پیر بابا کا رہائشی ہے، بھی اس صورتحال سے متاثر ہوا ہے۔
انہوں نے خبردار کیا کہ اگر پاکستانی شہریوں کے ویزوں اور کاروبار سے متعلق مشکلات بروقت دور نہ کی گئیں تو اس کے نتیجے میں ملک کو حاصل ہونے والے زرمبادلہ پر منفی اثر پڑ سکتا ہے۔ ان کے مطابق ممکنہ نقصان کی تلافی صرف برآمدات بڑھا کر کرنا آسان نہیں ہوگا، اس لیے حکومت کو معاملے پر فوری توجہ دینی چاہیے۔
