لاہور( این این آئی)پنجاب حکومت نے صوبے میں پرانی اور ناکارہ گاڑیوں کے حوالے سے بڑا فیصلہ کرلیاجس کے تحت ایسی گاڑیوں کو اسکریپ کیا جائے گا ۔
حکومت کی جانب سے اس پیشرفت کے لئے موٹر وہیکلز آرڈیننس میں تیسری ترمیم کی گورنر پنجاب نے منظوری دی ۔نجی ٹی وی کے مطابق آرڈیننس کے مطابق رجسٹریشن ختم یا منسوخ ہونے والی گاڑیاں ناکارہ گاڑیوں میں شامل ہوں گی،فٹنس یا دھوئیں کا سرٹیفکیٹ نہ لینے والی گاڑیوں پر بھی اسکریپنگ کی تلوار لٹکے گی۔حادثے، آگ یا قدرتی آفت میں تباہ ہونے والی گاڑی بھی اسکریپ قرار دی جاسکے گی،گاڑی کا مالک خود بھی اپنی ناکارہ گاڑی اسکریپ کروانے کے لئے جمع کروا سکے گا۔ناکارہ گاڑیوں کو باقاعدہ اسکریپنگ سینٹرز میں لے جایا جائے گا،اس سلسلے میں نجی و سرکاری مراکز قائم ہوں گے۔ ناکارہ گاڑیوں کے قابل استعمال پرزے نکالے جائیں گے، باقی حصے ری سائیکل کیے جائیں گے۔
آرڈیننس کے مطابق پنجاب میں آلودگی پھیلانے والی پرانی گاڑیوں کی اسکریپنگ کا نیا نظام متعارف کروایا گیا ہے،ناکارہ گاڑیوں کی اسکریپنگ کے لئے حکومت باقاعدہ قواعد بنائے گی۔رجسٹریشن منسوخ ہونے والی گاڑیاں اینڈ آف لائف وہیکل تصور ہوں گی۔پنجاب حکومت کے مطابق اس نظام کا مقصد دھوئیں کی آلودگی کم کرنا اور صاف ماحول یقینی بنانا ہے۔
