وفاقی حکومت نے عوام کو ریلیف دینے کے لیے ڈیزل کی قیمت میں نمایاں کمی کا فیصلہ کرلیا ہے۔

وفاقی وزیر پیٹرولیم علی پرویز ملک کا کہنا ہے کہ حکومت عوام کو درپیش مشکلات سے آگاہ ہے اور موجودہ حالات میں ہر ممکن ریلیف فراہم کرنے کی کوشش کی جا رہی ہے۔

علی پرویز ملک کے مطابق پٹرولیم مصنوعات کی قیمتوں میں سبسڈی دینا بھی عوام کو فوری سہولت پہنچانے کی حکومتی کوششوں کا حصہ ہے۔ انہوں نے کہا کہ حکومت کی جانب سے کیے جانے والے اقدامات سے مشکل وقت پر قابو پانے میں مدد ملے گی اور عوام کو تحفظ فراہم کرنے کے لیے تمام ممکنہ اقدامات جاری رکھے جائیں گے۔

وفاقی وزیر پیٹرولیم نے بتایا کہ جنگ کی شدت میں اضافے کے باعث عالمی سطح پر پٹرولیم مصنوعات کی قیمتوں میں اضافہ ہوا ہے، جبکہ متعدد ممالک کو ڈیزل کی دستیابی کے حوالے سے بھی مشکلات کا سامنا ہے۔

ان کا کہنا تھا کہ ملک کی ریفائنریز نے ڈیزل کی فی لیٹر قیمت میں 30 سے 32 روپے سے زائد کمی کرنے کا فیصلہ کیا ہے، جس سے عوام کو پٹرولیم مصنوعات کی قیمتوں میں نمایاں ریلیف ملنے کی توقع ہے۔