اسلام آباد (نیوز ڈیسک) کویت کی کمیونیکیشنز اینڈ انفارمیشن ٹیکنالوجی ریگولیٹری اتھارٹی (CITRA) نے آئی فون صارفین کے لیے ایک اہم سکیورٹی الرٹ جاری کرتے ہوئے جعلی ڈیلیوری اور شپمنٹ سے متعلق پیغامات سے خبردار کیا ہے۔

اتھارٹی کے مطابق دھوکا دہی میں ملوث عناصر آئی میسج کے ذریعے شپنگ اور کورئیر کمپنیوں کا روپ دھار کر صارفین کو پیغامات بھیج رہے ہیں۔ ان پیغامات میں عموماً وصول کنندگان سے شپمنٹ کی معلومات مکمل یا اپ ڈیٹ کرنے اور بعض اوقات ڈیلیوری فیس ادا کرنے کا کہا جاتا ہے۔CITRA نے شہریوں کو ہدایت کی ہے کہ ایسے پیغامات میں موجود کسی بھی مشکوک لنک کو کھولنے سے گریز کریں۔ صارفین کو اپنی ذاتی معلومات، بینک اکاؤنٹ کی تفصیلات یا دیگر مالیاتی معلومات بھی فراہم نہیں کرنی چاہئیں۔حکام کے مطابق کسی بھی پارسل یا ڈیلیوری سے متعلق معلومات کی تصدیق کے لیے متعلقہ کمپنی کی تصدیق شدہ ویب سائٹ یا اس کی سرکاری موبائل ایپ استعمال کی جائے۔

اسی ذریعے سے ادائیگی یا شپمنٹ سے متعلق درخواست کی حقیقت بھی جانچی جاسکتی ہے۔اتھارٹی نے صارفین کو مشتبہ پیغامات فوری طور پر حذف کرنے کے ساتھ ساتھ انہیں رپورٹ کرنے کا بھی مشورہ دیا ہے تاکہ ایسے فراڈ کی روک تھام میں مدد مل سکے۔CITRA کا یہ انتباہ ایسے وقت میں سامنے آیا ہے جب سائبر فراڈ میں ملوث عناصر ڈیلیوری اور شپمنٹ کے جعلی نوٹیفکیشنز کو استعمال کرکے لوگوں سے حساس ذاتی اور مالی معلومات حاصل کرنے کی کوششیں کر رہے ہیں۔