اسلام آباد (نیوز ڈیسک)حکومت نے عوام کو ایک اور جھٹکا دیتے ہوئے پیٹرولیم مصنوعات کی قیمتوں میں نمایاں اضافہ کردیا ہے۔

حکومت کی جانب سے جاری کردہ نوٹیفکیشن کے مطابق پیٹرول کی فی لیٹر قیمت میں 5 روپے 77 پیسے اضافہ کیا گیا ہے، جس کے بعد نئی قیمت 331 روپے 20 پیسے فی لیٹر مقرر ہوگئی ہے۔

اسی طرح ہائی اسپیڈ ڈیزل کی قیمت میں 6 روپے 47 پیسے فی لیٹر اضافہ کیا گیا، جس کے بعد ڈیزل کی نئی قیمت 390 روپے 42 پیسے فی لیٹر ہوگئی ہے۔

مٹی کے تیل کی قیمت میں بھی اضافہ کیا گیا ہے۔ اس کی فی لیٹر قیمت 6 روپے 88 پیسے بڑھا کر 296 روپے 63 پیسے مقرر کردی گئی ہے۔

پیٹرولیم ڈویژن نے 18 اگست سے نافذ العمل پیٹرولیم مصنوعات کی نئی قیمتوں کا باضابطہ نوٹیفکیشن جاری کردیا ہے۔