اسلام آباد(نیوز ڈیسک) حکومت نے آئندہ تین روز کے لیے پیٹرولیم مصنوعات کی موجودہ قیمتیں برقرار رکھنے کا فیصلہ کیا ہے،

تاہم پیٹرولیم ڈیلرز کے مارجن میں 1 روپے 34 پیسے فی لیٹر اضافہ منظور کرلیا گیا ہے۔اس فیصلے کے بعد پیٹرول 325 روپے 43 پیسے فی لیٹر جبکہ ہائی اسپیڈ ڈیزل 383 روپے 95 پیسے فی لیٹر میں دستیاب رہے گا۔اسلام آباد میں وزیر خزانہ محمد اورنگزیب کی زیر صدارت اقتصادی رابطہ کمیٹی (ای سی سی) کا اجلاس ہوا، جس میں پیٹرولیم مصنوعات پر ڈیلرز مارجن میں نظرثانی کی منظوری دی گئی۔اجلاس کے فیصلے کے مطابق ڈیلرز مارجن میں 1 روپے 34 پیسے فی لیٹر اضافہ کیا گیا ہے، جس کے بعد مجموعی مارجن 10 روپے فی لیٹر ہوگیا ہے۔

حکومتی فیصلے کے بعد پاکستان پیٹرولیم ڈیلرز ایسوسی ایشن نے اپنی اعلان کردہ ہڑتال ملتوی کرنے کا فیصلہ کیا ہے۔ ایسوسی ایشن کے مطابق مارجن میں اضافے کے بعد فوری طور پر ہڑتال کا فیصلہ واپس لے لیا گیا ہے۔دوسری جانب ڈیلرز کی جانب سے 8 فیصد مارجن کے مطالبے پر غور کے لیے ایک مشترکہ کمیٹی بھی قائم کردی گئی ہے، جو اس معاملے کا جائزہ لے کر 30 روز کے اندر اپنی رپورٹ پیش کرے گی۔