اسلام آباد (نیوز ڈیسک)کراچی کی کنزیومر پروٹیکشن کورٹ جنوبی نے ٹرین مقررہ وقت پر نہ پہنچنے کے کیس میں پاکستان ریلوے کو شہری کو 50 ہزار روپے ہرجانہ ادا کرنے کا حکم دے دیا۔

عدالت میں دائر درخواست کے مطابق شہری نے 2025 میں گھوٹکی سے کراچی سفر کے لیے خیبر میل کا ٹکٹ حاصل کیا تھا۔ درخواست گزار کا مؤقف تھا کہ ٹرین کو شام 6 بج کر 40 منٹ پر گھوٹکی سے روانہ ہونا تھا، تاہم وہ تقریباً 10 بج کر 11 منٹ پر روانہ ہوئی۔درخواست میں بتایا گیا کہ ٹرین کی روانگی میں تاخیر کے باعث کراچی پہنچنے کا مقررہ وقت بھی متاثر ہوا۔ ٹرین کو صبح 6 بج کر 40 منٹ پر کراچی پہنچنا تھا لیکن وہ 10 بج کر 45 منٹ پر منزل پر پہنچی۔شہری نے عدالت کو بتایا کہ ٹرین کی کئی گھنٹے تاخیر سے آمد کے باعث اس کے پہلے سے طے شدہ ضروری معاملات متاثر ہوئے اور اسے مشکلات کا سامنا کرنا پڑا۔

معاملے کی سماعت کے بعد کنزیومر پروٹیکشن کورٹ کراچی جنوبی نے پاکستان ریلوے کو مسافر کو ہونے والی پریشانی کے ازالے کے طور پر 50 ہزار روپے معاوضہ ادا کرنے کا حکم جاری کردیا۔