کراچی(این این آئی)عارف حبیب لمیٹڈ نے اپنے نام سے منسوب جعلی مصنوعی ذہانت (اے آئی) سرمایہ کاری اسکیم کے خلاف پاکستان اسٹاک ایکسچینج کو باضابطہ انتباہی خط ارسال کرتے ہوئے سرمایہ کاروں اور عوام کو محتاط رہنے کی ہدایت کی ہے۔

کمپنی کی جانب سے جاری اعلامیے کے مطابق بعض عناصر غیرقانونی طور پر عارف حبیب گروپ اور عارف حبیب لمیٹڈ کا نام استعمال کرتے ہوئے جعلی اے آئی سرمایہ کاری پلیٹ فارم کے ذریعے عوام کو دھوکا دینے اور فراڈ کی کوشش کر رہے ہیں۔عارف حبیب لمیٹڈ نے اپنے خط میں واضح کیا ہے کہ کمپنی یا عارف حبیب گروپ نے کسی بھی قسم کا مصنوعی ذہانت (AI) پر مبنی سرمایہ کاری پلیٹ فارم متعارف نہیں کرایا اور نہ ہی کمپنی کا کسی ایسی سرمایہ کاری اسکیم سے براہِ راست یا بالواسطہ کوئی تعلق ہے۔اعلامیے میں کہا گیا ہے کہ سوشل میڈیا اور دیگر ذرائع پر “عارف حبیب اے آئی پلیٹ فارم” کے نام سے سرمایہ کاری کی ترغیب دی جا رہی ہے، جس میں سرمایہ کاروں کو فی ہفتہ پانچ لاکھ روپے منافع دینے جیسے غیرحقیقی اور گمراہ کن دعوے کیے جا رہے ہیں، جن کا حقیقت سے کوئی تعلق نہیں۔

کمپنی نے واضح کیا کہ اس کے تمام اہم فیصلے، اعلانات اور سرمایہ کاری سے متعلق معلومات صرف کمپنی کے سرکاری ذرائع اور پاکستان اسٹاک ایکسچینج کے ذریعے جاری کی جاتی ہیں۔عارف حبیب لمیٹڈ نے عوام اور سرمایہ کاروں سے اپیل کی ہے کہ وہ کسی بھی غیر مصدقہ سرمایہ کاری اسکیم یا سوشل میڈیا اشتہار پر اعتماد نہ کریں، سرمایہ کاری سے قبل معلومات کی تصدیق کریں اور مشتبہ سرگرمیوں سے متعلق متعلقہ اداروں کو فوری آگاہ کریں تاکہ مالی فراڈ سے بچا جا سکے۔