اسلام آباد (نیوز ڈ یسک) پاکستان ٹیلی کمیونیکیشن اتھارٹی (پی ٹی اے) نے موبائل فون صارفین کو خبردار کرتے ہوئے کہا ہے کہ اپنے نام پر رجسٹرڈ سم کسی دوسرے شخص کے استعمال کے لیے دینا قانوناً جرم ہے،

کیونکہ ایسی سم غیرقانونی سرگرمیوں میں استعمال ہو سکتی ہے جس کی ذمہ داری رجسٹرڈ صارف پر عائد ہو سکتی ہے۔پی ٹی اے نے اپنے جاری کردہ پیغام میں شہریوں کو ہدایت کی ہے کہ وہ وقتاً فوقتاً یہ ضرور چیک کریں کہ ان کے قومی شناختی کارڈ پر کتنی سمیں رجسٹرڈ ہیں۔ اس مقصد کے لیے صارفین cnic.sims.pk پر جا کر معلومات حاصل کر سکتے ہیں یا پھر شناختی کارڈ نمبر بغیر ڈیش کے 668 پر ایس ایم ایس کر کے رجسٹرڈ سموں کی تفصیلات معلوم کر سکتے ہیں۔اتھارٹی نے مزید کہا کہ اگر کسی صارف کے نام پر کوئی ایسی سم رجسٹرڈ ہو جس کے بارے میں اسے علم نہ ہو یا جس کی ضرورت نہ ہو، تو اسے فوری طور پر بند کروانا چاہیے تاکہ کسی بھی ممکنہ غلط استعمال سے بچا جا سکے۔

پی ٹی اے نے شہریوں کو مشورہ دیا ہے کہ نئی سم صرف مجاز فرنچائز یا متعلقہ کمپنی کے کسٹمر سروس سینٹر سے ہی حاصل کریں اور اس بات کو یقینی بنائیں کہ ان کی اجازت اور بائیو میٹرک تصدیق کے بغیر کوئی سم ان کے نام پر جاری نہ ہو۔ادارے نے یہ بھی یاد دہانی کرائی کہ مفت سم یا دیگر مراعات کے لالچ میں کسی غیر متعلقہ شخص کو اپنی بائیو میٹرک تصدیق نہ دیں، کیونکہ اس طریقے سے فراڈ کر کے آپ کے نام پر اضافی سمیں جاری کی جا سکتی ہیں، جو بعد میں قانونی مسائل کا سبب بن سکتی ہیں۔