اسلام آباد (نیوز ڈیسک) وفاقی حکومت نے ایک بار پھر پیٹرولیم مصنوعات کی قیمتوں میں اضافہ کرتے ہوئے نئی قیمتوں کا اطلاق 24 جولائی سے کر دیا ہے۔

پیٹرولیم ڈویژن کی جانب سے جاری کردہ اعلامیے کے مطابق پیٹرول کی فی لیٹر قیمت میں 4 روپے 40 پیسے اضافہ کیا گیا ہے، جس کے بعد اس کی نئی قیمت 331 روپے 52 پیسے فی لیٹر مقرر کر دی گئی ہے۔اسی طرح ہائی اسپیڈ ڈیزل کی قیمت میں بھی 3 روپے 62 پیسے فی لیٹر اضافہ کیا گیا ہے۔ نئی قیمت کے مطابق ڈیزل اب 378 روپے 66 پیسے فی لیٹر فروخت ہوگا۔یہ مسلسل دوسرا دن ہے جب حکومت نے پیٹرولیم مصنوعات کی قیمتوں میں اضافہ کیا ہے۔

اس سے قبل بھی پیٹرول کی قیمت میں 6 روپے 39 پیسے جبکہ ہائی اسپیڈ ڈیزل کی قیمت میں 7 روپے 83 پیسے فی لیٹر کا اضافہ کیا گیا تھا۔مسلسل بڑھتی ہوئی قیمتوں کے باعث ٹرانسپورٹ کے اخراجات، کرایوں اور روزمرہ استعمال کی مختلف اشیاء کی قیمتوں میں مزید اضافے کے خدشات بھی پیدا ہو گئے ہیں۔