کراچی(این این آئی) محکمہ ریونیو سندھ کا سسٹم تین روز سے غیر فعال ہے ،
جس کے باعث ہزاروں شہری جائیداد ٹرانسفر کروانے کے لئے پریشان ہیں۔تفصیلات کے مطابق محکمہ ریونیو سندھ کا عملہ جائیدادوں کی منتقلی کا آن لائن سسٹم بحال کرنے میں بری طرح ناکام ہو گیا ہے، جس کے باعث مسلسل تین روز گزرنے کے باوجود صوبہ بھر میں جائیداد کی خرید و فروخت اور ٹرانسفر کا عمل مکمل طور پر معطل ہے۔وزیر اعلیٰ سندھ سید مراد علی شاہ کی جانب سے معاملے کا سخت نوٹس لیے جانے کے باوجود متعلقہ عملہ تکنیکی خرابی کو دور کرنے میں ناکام رہا ہے، جس نے محکمے کی کارکردگی پر سوالیہ نشان کھڑا کر دیا ہے۔محکمہ ریونیو نے گزشتہ روز ایک پریس ریلیز کے ذریعے سسٹم کی مکمل بحالی کا دعویٰ کیا تھا، جو سراسر جھوٹا ثابت ہوا جبکہ حقیقت یہ ہے کہ سسٹم اب بھی غیر فعال ہے اور ہزاروں شہری اپنی جائیدادیں ٹرانسفر کروانے کے لیے دفاتر کے چکر کاٹ کر شدید پریشان ہو رہے ہیں۔محکمہ ریونیو سندھ کے حکام نے بالآخر اعتراف کیا ہے کہ آن لائن پورٹل اور سسٹم میں شدید تکنیکی خرابی موجود ہے، خرابی کے باعث جائیدادوں کی منتقلی کے لیے لازمی چالان ڈاؤن لوڈ نہیں ہو رہے، جس سے پورا پراسیس رک گیا ہے۔
دوسری جانب محکمہ ریونیو کے اعلیٰ حکام کا روایتی مؤقف سامنے آیا ہے کہ عملہ سسٹم کی خرابی کو درست کرنے کے لیے مسلسل کام کر رہا ہے اور اسے جلد فعال کر دیا جائے گا۔
