اسلام آباد (نیوز ڈ یسک) امریکا اور ایران کے درمیان بڑھتی ہوئی فوجی کشیدگی کے باعث عالمی سطح پر خام تیل کی قیمتوں میں مسلسل اضافہ دیکھا جا رہا ہے۔

تازہ ترین کاروباری سیشن میں برینٹ خام تیل کی قیمت 92 ڈالر فی بیرل کی حد عبور کر گئی۔بین الاقوامی میڈیا رپورٹس کے مطابق برینٹ کروڈ فیوچرز میں تقریباً ایک ڈالر، یعنی 1.1 فیصد اضافہ ریکارڈ کیا گیا، جس کے بعد اس کی قیمت 92.01 ڈالر فی بیرل تک پہنچ گئی۔دوسری جانب امریکی خام تیل ویسٹ ٹیکساس انٹرمیڈیٹ (WTI) کی قیمت بھی بڑھ گئی۔ اس میں 82 سینٹ، یعنی تقریباً ایک فیصد اضافہ ہوا، جس کے بعد یہ 85.16 ڈالر فی بیرل پر ٹریڈ ہوتا رہا۔رپورٹس کے مطابق گزشتہ روز بھی عالمی منڈی میں خام تیل کی قیمتیں پانچ ہفتوں کی بلند ترین سطح پر بند ہوئی تھیں۔ اس وقت برینٹ خام تیل 91.01 ڈالر جبکہ ڈبلیو ٹی آئی 84.91 ڈالر فی بیرل کی سطح پر ریکارڈ کیا گیا تھا۔

توانائی کے شعبے سے وابستہ ماہرین کا کہنا ہے کہ مشرقِ وسطیٰ میں بڑھتی ہوئی جغرافیائی کشیدگی، خصوصاً امریکا اور ایران کے درمیان جاری فوجی تناؤ، عالمی منڈی میں تیل کی قیمتوں میں اضافے کی اہم وجہ بن رہا ہے۔ ان کے مطابق اگر موجودہ صورتحال برقرار رہی تو آنے والے دنوں میں قیمتوں میں مزید اتار چڑھاؤ دیکھنے کو مل سکتا ہے۔