کراچی (این این آئی)کے الیکٹرک نے سوشل میڈیا پر گردش کرنے والے اس دعوے کی تردید کر دی ہے
جس میں کہا جا رہا تھا کہ اگر کوئی پروٹیکٹڈ صارف ایک ماہ کے دوران 200 یونٹس سے زیادہ بجلی استعمال کر لے تو وہ ہمیشہ کے لیے پروٹیکٹڈ کیٹیگری سے خارج ہو جائے گا۔کے الیکٹرک کی جانب سے جاری وضاحتی بیان میں کہا گیا ہے کہ سوشل میڈیا پر وائرل ہونے والی یہ معلومات درست نہیں ہیں اور پروٹیکٹڈ کیٹیگری سے متعلق پالیسی میں کوئی نئی تبدیلی نہیں کی گئی۔ترجمان کے مطابق نان ٹی او یو (NonـTOU) رہائشی صارف اگر کسی ایک ماہ میں 200 یونٹس سے زیادہ بجلی استعمال کرتا ہے تو اس کا پروٹیکٹڈ اسٹیٹس مستقل طور پر ختم نہیں ہوتا۔ اگر بعد ازاں وہ مسلسل چھ ماہ تک ہر مہینے 200 یا اس سے کم یونٹس استعمال کرے تو مقررہ قواعد کے مطابق اس کا پروٹیکٹڈ اسٹیٹس دوبارہ بحال ہو سکتا ہے۔
کے الیکٹرک نے صارفین کو مشورہ دیا ہے کہ بجلی کے بلوں، پروٹیکٹڈ کیٹیگری یا دیگر پالیسیوں سے متعلق کسی بھی خبر یا نوٹس پر یقین کرنے سے قبل ادارے کے سرکاری ذرائع سے اس کی تصدیق ضرور کریں اور سوشل میڈیا پر پھیلائی جانے والی غیر مصدقہ اطلاعات سے گریز کریں۔ترجمان نے کہا کہ صارفین کی سہولت کے لیے تمام مستند معلومات کے الیکٹرک کے سرکاری پلیٹ فارمز پر دستیاب ہیں، لہٰذا کسی بھی قسم کی افواہوں یا غیر تصدیق شدہ اطلاعات کی بنیاد پر تشویش میں مبتلا ہونے کی ضرورت نہیں۔
