اسلام آباد (نیوز ڈیسک )لاہور ہائی کورٹ کے چیف جسٹس نے پنجاب کی عدلیہ سے وابستہ جوڈیشل افسران کے لیے رعایتی قیمت پر سرکاری گاڑیاں فراہم کرنے کی نئی اسکیم کی منظوری دے دی ہے۔
اس حوالے سے باقاعدہ سرکلر بھی جاری کر دیا گیا ہے۔سرکلر کے مطابق ٹرانسپورٹ مونیٹائزیشن فیسیلٹی کے تحت صوبے بھر کے تقریباً دو ہزار جوڈیشل افسران کو ڈھائی لاکھ سے ساڑھے تین لاکھ روپے تک کی رعایتی قیمت پر سرکاری گاڑیاں خریدنے کا موقع فراہم کیا جائے گا۔اس سہولت سے ڈسٹرکٹ اینڈ سیشن ججز، ایڈیشنل ڈسٹرکٹ اینڈ سیشن ججز، سینئر سول ججز، سول ججز اور فیملی کورٹس کے ججز مستفید ہو سکیں گے۔
اس کے علاوہ انسدادِ دہشت گردی عدالتوں، احتساب عدالتوں، بینکنگ کورٹس، ایف آئی اے، انسدادِ منشیات، کسٹمز اور لیبر کورٹس میں خدمات انجام دینے والے ججز بھی اس اسکیم کے اہل ہوں گے۔سرکلر میں مزید بتایا گیا ہے کہ سپریم کورٹ، اسلام آباد ہائی کورٹ، آئینی عدالت اور دیگر قومی اداروں میں ڈیپوٹیشن پر تعینات پنجاب جوڈیشری کے افسران کو بھی اس منصوبے میں شامل کیا گیا ہے، تاکہ وہ بھی رعایتی نرخوں پر سرکاری گاڑیاں حاصل کر سکیں۔
